Ellis (ATA Europa): Aruba ta un destinacion amistoso pa e comunidad LGBTQI+

AMSTERDAM – Oficina di turismo di Aruba na Hulanda, recientemente a celebra PRIDE na e hotel luhoso Sofitel Legend The Grand na Amsterdam durante e evento di cocktail PRIDE.    “Nos por bisa cu seguridad cu Aruba ta un destinacion amistoso pa (e comunidad) LGBTQI+ unda cu bo por disfruta di un vacacion sigur y sin preocupacion” gerente di mercadeo y benta pa ATA Europa, Jaap Ellis a declara na e portal Hulandes travmagazine. E evento menciona cu ta haya mas di 400 bishitante pa aña, entre cual hopi di e comunidad LGBTQI+ ta atende, a conta e biaha aki cu participacion di ATA y a bira un fiesta Caribense grandi. Completo cu draggueens y musica di e artista Arubano Aymar Torres, cuminda Caribense y cocktail Aruba Ariba, tur hende tabata den e ambiente tropical segun e portal. Henter e ekipo di ATA a pone Aruba den luz como un destinacion amistoso pa e comunidad menciona. A resalta cu na Aruba tur hende ta bon bini y cu e isla tabata e prome pa ofrece union entre pareha di mesun sexo, y cu hopi hotel na Aruba ta celebra PRIDE riba e isla, y ta haya importante cu tanto bishitante y trahado mester por ta nan mes. Segun Ellis, ta obvio cu ainda falta mas paso pa loke ta e aspecto legal, pero cu por ta sigur cu Aruba ta un destination amistoso pa e comunidad LGBTQI+.