Corsou no ta logra entrega presupuesto 2024 na tempo e aña aki na Parlamento

WILLEMSTAD - Minister di Finansa ta kontemplá, via intermediashon di Konseho di Minister, pa pidi Parlamento pa por entregá e presupuesto pa aña 2024 mas despues. E presupuesto lo mester keda presentá na parlamentu riba e di dos djamars di sèptèmber (konforme artíkulo 85 insiso 3 di areglo di estado) pa e aña akí. Un plan di presupuesto balansá pa 2024 a ser presentá na Kolegio di supervishon finansiero Cft i Raad van Advies RvA pa konseho. Sinembargo, e presupuesto pa 2024 a ser formulá basá riba tur informashon konosí te luna di yüli 2023.

Ministerio di finansa ta splika ku aktualmente tin negoshashon ku Ulanda en konekshon ku refinansiamentu di fiansanan likides (ad NAf 911 mln.), finansiamentu di invershonnan duradero i solushon di problemátika di ENNIA (posiblemente ku un fiansa di Ulanda).

E negosiashonnan aki ta den e último fase. Ta spera ku den fin di sèptèmber 2023 un akuerdo atministrativo lo ser lográ ku Ulanda, tokante refinansiamentu di fiansanan di likides i resolushon di Ennia.

Na e momento ei tambe e kondishonnan di e fiansanan, manera e forma di fiansa i e haltura di interes, lo ta konosí. E kondishonnan di refinansiamentu i formanan di finansiamentu ku ainda mester ser akordá (entre otro interes) probablemente lo tin un impakto grandi riba e presupuesto di 2024. Den e presupuesto aktual pa 2024, e konsekuensianan di e negosiashonnan no a ser inkorporá ainda. E negosiashonnan ainda ta kanando.

E inkorporashon di e efektonan di e negosiashonnan menshoná den e presupuesto 2024 por tuma lugá despues ku e negosiashonnan aktual finalisá. Esaki ta e motibu pa Minister di Finansa pidi Parlamento pa posponé e presentashon di presupuesto 2024. Den kaso di un posponementu mester tene kuenta ku e echo ku Raad van Advies i Cft mester evaluá e presupuesto 2024 adaptá i p’esei mester pidi pa posponé e entrega di presupuesto te 6 di novèmber.

Naturalmente, konseho legal a ser pidí tokante e asuntu aki. Konseho a ser pidí na sektor di Lei i Asuntunan Hurídiko di ministerio di Asuntunan general. E konseho aki lo tin di tene kuenta ku lei i regulashonnan vigente manera Lei pa Kontabilidat 2010, Lei pa Maneho Finansiero, Areglo di estado di Kòrsou i prinsipionan di bon gobernashon.

Si ta posibel pa presupuesto 2024 por keda presentá mas despues en bes di e di dos djamars di sèptèmber 2023, esaki ta duna oportunidat pa inkorporá e efektonan di e kondishonnan di e fiansanan menshoná (ku ta sperá di lo konosí na fin di sèptèmber 2023), inkluso posibel medidanan di kompensashon, pa logra un presupuesto balansá manera Rijkswet  di supervishon finansiero Rft ta eksihí.  Di e forma aki por tuma lugá un tratamentu den parlamentu di presupuesto efektivo a base di e último desaroyonan i echonan. NOTA: Texto ta sciribi den Papiamento fonetico di Corsou.