Minister a manda director di Dimas traha como hurista na DWJZ

ORANJESTAD – Algun dia prome cu sra Kathy Paskel mester a reanuda su trabou na Dimas como director, e la haya notificacion cu minister di Labor Glenbert Croes cu ta responsabel pa Dimas, a mande pa traha como wetgevingsjurist (hurista) naDirectie Wetgeving en Juridische Zaken ( DWJZ) pa un periodo di 6 luna. Esaki siendo cu Direccion di Recurso Humano (DRH) a inform’e cu e investigacion disciplinario contra dje algun luna pasa a keda termina y cu ‘no a consta plichtsverzuim y lo no tin un conseho pa castigo disciplinario’. E minister encarga a keda di reacciona pa e portal aki proximamente segun su reaccion breve diamars mainta. 

CARTA PA DIMAS

Mirando e situacion, Noticiacla a compronde,- y tin un carta den su poder cu e la haya di fuentenan cerca di e proceso -, unda cu sra Paskel ta informa e trahadonan di Dimas di e situacion. E ta splica henter e proceso cu cuminsa for di 3 di mei ultimo ora cu e minister en cuestion a haya necesario pa impone un medida di orden den forma di un negacion di entrada na edificio of systemanan di DIMAS, pendiente e preparacion y tambe ehecucion di un investigacion disciplinario contra su persona. E ta informa nan tambe di e notificacion di DRH manera cu e portal aki a menciona mas ariba. Aki e ta relata tambe di e carta cu e la ricibi, den forma di un decreto ministerial unda cu e minister ta impone un orden temporal cu duracion di seis (6) luna pa e eherce tareanan di preparacion di leynan na DWJZ cuminsando 3 di augustus 2023. Segun sra Paskel, e ta splica cu pesey e no a presenta ainda na Dimas pa reanuda y asumi su funcion y responsabilidad como director di Dimas. 

REACCION MINISTER

E minister riba pregunta di e portal aki diamars mainta, a bisa cu door cu e caso ta andando, e mester a averigua con e por reacciona sin complica e caso, mirando cu tin caso tumando lugar na September proximo. E la keda pendiente pa reacciona mas laat pa e portal aki. Manera ta conoci, e minister en cuestion algun luna pasa a dicidi cu ta manda sra Paskel cas pendiente e investigacion anuncia, debi cu segun e mandatario, sra Paskel no tabata funciona adecuadamente segun kehonan cu e lo a ricibi. A mande cas pa 3 luna cu pago, mientras cu tabata haci e investigacion necesario disciplinario.