Minister ta entrega keho penal contra periodista pa atacha su imagen y credibilidad

ORANJESTAD – Minister di husticia di Aruba Rocco Tjon awe mainta ta entrega un keho penal contra periodista Patrick Paskel pa  atacha e imagen di su credibilidad como persona y como minister di Husticia y Asuntonan Social. E mandatario a confirma na e portal aki cu e keho lo wordo entrega awe mainta. Segun e mandatario, tabata diamars merdia durante noticiero riba canal 88.9, a travez di e programa Enfoke, cu e periodista  a menciona cu su persona (Tjon:red) a wordo deteni door di Landsrecherche tempo cu e (Tjon:red)  tawata eherce su funcion den Cuerpo Policial. “ Ademas di esaki, Patrick Paskel a bisa cu esaki lo tawata tin di haber cu un caso caminda Polis lo a duna informacion clasifica y ricibi placa pa cu esaki, y cu mi persona lo a participa den e tipo di acto aki” e mandatario ta sigui bisa.

DESMENTI ROTUNDAMENTE

“Por medio di e comunicado aki, mi ta desmenti rotundamente tur cos cu a wordo treci padilanti, durante e programa “Enfoke”. Mi persona nunca a wordo deteni of tawata envolvi (ni como verdachte ni como getuige) den un caso di e indole aki. Mi persona no a participa na ningun caso unda un Agente Policial lo a paga un otro Agente Policial pa ricibi ningun tipo di informacion” e la sigui bisa. “ Mi nunca tawata deteni na Landsrecherche, sigur no pasobra mi no tawata integro den mi funcion anterior” Tjon a continua bisando. 

KEHO PENAL

Segun e mandatario, ta trata un biaha mas di un mentira indignante, pa e motibo, un keho penal lo ser entrega debidamente en contra di esaki. “E tipo di engañonan aki ta atacha e imagen di mi credibilidad como persona y como minister di Husticia y Asuntonan Social, simplemente pa crea rabia den comunidad y pa bruha tera” e mandatario a sigui bisa. E periodista en cuestion no a reacciona riba e keho ainda, riba peticion di e portal aki.