Corte a destrui decision pa retira ex director di imigracion Gerald Vingal

ORANJESTAD – Corte di LAR dialuna a destrui e sentencia di retiro contra e ambtenaar Gerald Vingal, di su funcion como director di imigracion. Ta trata di e decision di juli di 2022 unda cu gobierno (lesa: minister di husticia Rocco Tjon:red) a duna Vingal su retiro cu motibo di supuesto mal ehecucion di su funcion, citando algun punto specifico. Vingal a bringa e decision aki un luna despues y e caso a keda trata na October di aña pasa. E aña aki na mei, Corte a duna Vingal razon den un sentencia temporal unda cu gobierno mester pague e salario for di dia cu a retire un aña prome. E sentencia tabata pendiente e caso di profundidad, cu a haya su sentencia awe, confirmando e sentencia original y cu gobierno mester carga gasto di e proceso tambe. 

E CASO

Gobierno a purba hustifica e retiro di Vingal, debi na e hecho cu e lo a haci su mes culpable na incumplimento serio di no present na trabou, y cu no tin confiansa mas den dje pa cu su actuacion supuesto integro  como ambtenaar. Ademas e lo a viola su deber di secrecia y cu e ta tolera cu su trahadonan tambe ta viola nan deber di secrecia di trabou. Tambe cu e lo a ricibi regalo y cu a tolera cu su coleganan di trabou tambe a ricibi regalo, manera banners, television, y carchi pa por lo menos tres festival. Ademas e lo a malusa su poder conforme instruccion di trabou. Tambe cu Vingal lo ta forma parti of ta anda cu un netwerk criinal     di traficacion di hende. Vingal a desmenti tur e puntonan aki den su defensa. Pa loke ta e urgencia di e caso, a mustra cu conforme documento di banco, cu debi cu Vingal no a ricibi su salario pa casi un aña, e la core un atraso serio di pago di su debenan pa cual e banco en cuestion a ordene un pago grandi di mas di 30 mil florin. Esaki ta pone cu e caso segun Vingal ta uno urgente pa e ricibi su pago atrasa pa cumpli cu su debernan, mientras cu e caso ta cana su caminda. Segun corte, no por a prueba cu Vingal a haci e loke e la wordo acusa di dje, manera falta di trabou, y cu ricibi regalo no ta indica cu e lo a falta na trabou. Ademas den su retiro, no ta specifica cu e lo a haya regalo di tercero, y como tal no por culpa Vingal di tal. Tampoco a prueba cu e loke cu a culpa Vingal di a ricibi, cu esakinan tabata enberdad regalo. Teniendo tur esaki y mas punto na cuenta, corte a yega na e conclusion cu no por culpa Vingal di iregularidad y incumplimento di trabou y como tal ta suspende e decision di retiro contra Vingal. Por lesa e sentencia AKI.