Atrobe cruzada na Wayaca/Primavera ta bira sitio di accidente

ORANJESTAD – E siman aki (diaranson) un biaha mas e cruzada popular na Wayaca/Primavera a bira sitio di accidente entre dos auto. Danki Dios cu ta solamente daño material tabatin aunke e chauffeur di e auto cu a wordo gedal, tabata sinti poco dolor si. E dama cu a wordo gedal, a splica cu e tabata riba e caminda di preferencia y e auto cora a sigui core y bin dal den dje y ta menos mal e mes no tabata core duro, sino e daño lo tabata mas pio ainda. E daño material tabata bastante atrobe y pa varios rato, e cruzada aki a keda pega debi na e situacion cu e accidente a crea. A surgi mesora e discusion pakico accidente ta sigui sosode na e cruzada aki, unda cu ya caba tabatin accidente cu morto algun aña atras. Algun tempo atras a pone borchi grandi y a pinta e liñanan riba caminda pa alerta ken tin preferencia, si en caso e automobilista a ‘lubida’ su reglanan di trafico ora cu e la pasa su rijbewijs. Pero ta parce cu ni asina esaki no ta stop automobilistanan di dal nan auto, simplemente pasobra nan ta core duro of no sa regla di trafico. 

SPEEDBUMPS

E habitantenan di e besindario a cansa di pidi autoridad pa pone speedbumps osea ‘polis drumi’ pa asina sikiera slow down e autonan cu ta core riba e caminda ey. Un habitante a conta cu por lo menos 10 auto ta pusta pa ora riba e caminda aki, y esey ta den dia cla, corda anochi. Den pasado tambe algun minister a priminti pa pone speedbumps, pero te ainda nada di esaki. E accidente di ayera ta muestra cu ta wardando algo mas serio pasa prome cu autoridad actua.

SITUACION PECULIAR

Loke a hala atencion diaranson tabata ora cu e accidente a caba sosode, varios parti di un di e autonan, a keda plama riba caminda. E parti peculiar tabata cu un grupo di cacho tabata canando eybanda y a dicidi di coi algun di e partsnan di e auto den nan boca y purba bay cu nan, manera ladron di parts den dia cla. Otro asunto peculiar tabata cu un grua cu a bin busca e autonan, a pega eynan y daña y cu e mester a wordo asisti pa otro grua (takelwagen) na e sitio, creando un situacion mas complica ainda. 

POLIS

Ora cu a yama polis, a bisa cu si no tin herido, polis no ta bin y cu tin cu yama seguro so. Pero pa ‘suerte’, net un polis tabata pasa eybanda (den e caya por cierto tin yen di polis y ex polis cu ta biba, y a dicidi di tuma control di e situacion. Dado momento por a mira te hasta dos auto di polis pa atende cu e situacion. Esaki pasobra e cruzada ta uno crucial cu ta hopi frecuenta y esaki a cuminsa crea un fila indesea.