Na Corsou SVB a propone pa hisa edad di pensioen na 2030

WILLEMSTAD - Banko di Seguro Sosial (SVB) tin un proposishon ku el a entregá na gobièrnu pa hisa edat di penshun entrante aña 2030. Esei ta forma parti di un pakete di akshon ku el a proponé na gobièrnu pa evitá ku sierto fondonan, prinsipalmente penshun di behes, ta hañ’é den problema. Manera ta konosí, algun aña pasá pa e mesun motibunan aki a hisa e edat di penshun di 60 pa 65 aña. I teniendo kuenta ku e enbehesimentu den komunidat, SVB ta ser konfrontá ku e preshon di hisa edat di penshun.

Den su relato anual ku el a kaba di entregá SVB ta bisa den e parti final i su rekomendashonnan e.o. ku e enbehesimentu rápido ta manifestando su mes klaramente den e fondo di AOV (penshun di behes) i tambe den maneho di e kostonan médiko ku ta pa kuenta di Seguro Básiko, i esaki ta keda komo un punto di atenshon importante. Segun SVB, sin un kresementu ekonómiko akseptabel i struktural den kual e base di prima ta subi di forma konsiderabel, e resultado den kaso di un maneho sin kambio, i sin implementá e diferente rekomendashonnan ku a ser duná, lo empeorá.

SVB ta spera ku e desishonnan ku mester ser tumá pa loke ta e diferente proposishonnan, medidanan i nan implementashon lo tuma lugá mas pronto posibel pa evitá ku ta trese un distorshon den e sistema.

Mas aleu e entidat ta hasi menshon di lantamentu di un Komishon di Reforma Seguronan Sosial pa entre otro pa atendé palabrashonnan hasí den  e landspakket. E komishon a laga hasi un investigashon dje sistema di seguronan sosial na Kòrsou i a duna rekomendashonnan pa e sistema por ta duradero. E rapòrt definitivo den kaso dje investigashon ariba menshoná pa loke ta seguridat sosial na Kòrsou, den konkordansia ku medidanan pa reforma di e merkado laboral a ser entregá na Minister di SOAW na yüni 2023. NOTA: Texto scirbi na Papiamento fonetico di Corsou.