Despues di algun ora fuera di servicio, Aruba Bank a restaura servicio di e.o. ATM y POS

ORANJESTAD  - Despues di varios ora di no tabata funciona, Aruba Bank a anuncia diamars anochi laat cu nan problema di conexion cu a afecta nan Online Banking, Mobile Banking, ATMs, POSs, y servicionan di Tarheta di Debito tabataresolvi atrobe. Tabata for di algo despues di diamars merdia, diripiente clientenan di e banco no por a hay anan servicio di placa, sea di ATM of usa nan carchi pa haci compra pasobra hasta e machinan di POS no tabata funciona. Ni online banking tabata funciona. A resulta cu tabatin un proceso cu e banco tabata haci cu lo a bay robez y cu a pone cu henter e sistema menciona, a cay. E banco a manda un email pa tur su clientenan cu e informacion al respecto. Esaki sinembargo no a kita hende di bay reclama riba rednan social y mustra nan malcontento cu nan no por a haci nan transaccionan manera tabata mester. “E banco su ekipo tecnico a traha duro pa restaura e conexion y tur servicio ta den funcion” e banco a laga sa despues. “ Cu diligencia y cooperacion cu entidadnan local, Aruba Bank a logra restaura conexion di tur canal bancario. Clientenan por conduci transaccion via Online Banking, Mobile Banking, y ATMs sin problema. E servicionan di Point of Sale (POS) tambe ta reestableci” e banco a sigui bisa. Ademas e banco a sigura cu nan ta realisa e importancia di servicio bancario continuo y sin interupcion y ta comprometi na duna un servicio superior na cliente.