ELMAR: Casonan di conductor cu ta hit & run poste di luz ta birando preocupante

ORANJESTAD – E cantidad di casonan di conductornan cu ta “hit & run” e postenan di luz di caya of coriente ta birando mas y mas preocupante, specialmente den casonan unda ELMAR no ta wordo informa riba e daño causa na e postenan. Asina e compania di suministro di coriente ELMAR a bisa dialuna. E ta referi na e varios accidentenan di trafico cu a envolvi postenan di luz of coriente. Manera ta conoci, durante e fin di siman cu a pasa, a sosode 3 diferente accident di auto na Paradera, Avenida Nelson Oduber y Santa Cruz envolviendo postenan di luz di caya of coriente, causando un peliger pa e conductor y nan alrededor. E situacion aki no ta solamente causa daño na e grid di coriente di Aruba, pero tambe ta laga un area sin suministro di coriente temporalmente, cu ta causa incomodidad pa nos clientenan.

CASONAN DI HIT & RUN DI POSTENNAN DI LUZ   

Ademas, e cantidad di casonan di conductornan cu ta “hit & run” e postenan di luz di caya of coriente ta birando mas y mas preocupante, segun Elmar, y specialmente den casonan unda ELMAR no ta wordo informa riba e daño causa na e poste. Consecuencia di esaki ta cu e ta laga e area alrededor di e poste y e grid di coriente den un situacion vulnerabel.

GRID RIBA TERA 

“Nos kier pone enfasis riba e importancia di siguridad den trafico, pasobra gran parti di e grid di coriente di Aruba ta riba tera. E motibo di esaki ta cu kabelnan bou tera lo aumenta e duracion pa realisa trabounan di reparacion” Elmar ta sigui bisa. Ademas cu e tera di Aruba ta seco y duro cu ta trece costonan halto pa coloca henter e grid di coriente bou tera. Den tur dos caso, e infrastructura di trafico di Aruba lo inclui postenan di luz di caya.“ Pa e motibo, nos kier haci un yamada na tur conductor pa maneha cu cuidou y consciente, sigui reglanan di trafico, pa asina evita accident di auto. Tur hende riba caminda ta forma parti di nos comunidad y nos tin cu traha hunto pa mantene un ambiente di trafico sigur pa un y tur” Elmar a finalisa bisando.