Segun ultimo lista mundial di ranking di FIFA, Aruba ta na 203 y Corsou 88

MIAMI – Segun e federacion internacional di futbol FIFA su ultimo lista di cualificacion mundial pa futbol masculino, tin varios pais cu a subi nan posicion mientras otronan a baha. Entre nan, Panama a subi cu 12 punto, mientras cu Mexico a subi pa posicion 12 uno bou di Merca cu ta na 11. Aruba tambe a subi 1 posicion y yega number 203. Mes momento Corsou, ta riba un posicion hopi mas halto cu Aruba na 88, pero no a aumenta di posicion. E prome 10 nan no tabatin cambio unda cu Argentina ta lidera e lista, sigui pa Francia number 2 y Brazil number 3, sigui pa Inglatera 4, Belgica 5 y Croacia number 6. Recientemente minister di deporte di Aruba Endy Croes a splica cu Aruba dificilmente por ta mas halto si ni na Aruba nan no por hunga nan weganan pues nan aspiracion aworaki simplemente no tey, compara cu Corsou cu si a mira hopi mas accion y tabatin triumfonan cu a pone cu e ta 115 puesto mas halto cu Aruba, un isla bisiña apenas 127 kilometer leu di otro. 

E SITUACIONSegun splicacion di FIFA riba nan portal, Aruba ta riba un lista di pais no mucho envidia. “Banda di e ranking global di nan ekipo nacional, tin otro informacion estadistica cu ta confirma cu e percepcion general cu Aruba, no ta bon den e deporte mas popular di mundo”. 

MIEMBRO DI FIFA

Mientras cu Arubaanse Voetbal Bond a keda funda na 1932, e la bira miembro di FIFA te na 1988, dos aña despues di a uni cu e confederacion regional CONCACAF. Nan ta miembro tambe di  e Caribbean Football Union desde 1988. Desde cu Aruba a haya reconcemento global, nan a bin ta tuma parti regularmente den weganan clasificatorio pa campeonatonan Mundial, CONCACAF y Gold Cup y tambe e competencia Caribeño. “Pero cada bez nan ta faya di haci un impression” FIFA ta finalisa bisando. Manera minister di deporte Endy Croes a bisa, e ta spera cu unabez Stadion Guillermo Prospero Trinidad keda renoba y haya e status oficial di FIFA, y cu tin suficiente sosten y medionan financiero, cu Aruba por cuminsa luci den e deporte futbol riba tereno internacional. Pa wak e lista completo di paisnan, click AKI.