Na Corsou, un compania local a haya sla di 50.000 euro na man di “hackers”

WILLEMSTAD  – Un kompania lokal ku ta okupá nan mes ku servisio di “Cargo”, a haña un sla duru despues ku a “hack” nan e-mail adrès. Esaki a kosta e kompania mas o ménos 60.000 euro. Esaki a sali na kla den un veredikto di korte siman pasá.

Despues ku tabatin un oudiensia den Korte di Hurisdikshon Sivil dia 23 di yanüari di e aña aki, siman pasá korte ta dikta fayo den e kaso aki. Ta trata di un kompania establesé na Ulanda ku a hiba e kompania lokal, pa motibu ku nan no a paga un di nan fakturanan di mas o ménos 50.000 euro. Remarkabel ta ku ta trata di dos kompania ku tin un relashon di trabou di mas di 30 aña i ku e relashon a kaba den korte.

E kompania di kargo lokal tin 30 aña komo agente di e kompania establesé na Ulanda. Durante tur e añanan aki e kompania lokal ta realisá pagonan via di un kuenta na ABN AMRO na Ulanda i semper tur kos a bai bon.

Den un karta fechá 17 di desèmber 2021, e kompania lokal ta anunsiá terminashon di e koperashon entrante 31 di yanüari 2022.

Den e periodo ku a sigui, e partidonan a mantené korespondensia riba e pagonan parsial ku no a wòrdu realisá ainda den e konteksto di e likidashon finansiero.

Den un e-mail fechá 15 di mart 2022, e kompania lokal  a puntra e kompania ulandes  na kua kuenta banko nan por a transferí un pago parsial di 38.762, 90 Euro.

Den un e-mail riba e mesun dia  e kompania ulandes ta kontestá ku transferí e pago na e number di kuenta normal di ABN AMRO.

Mas o ménos un siman despues e kompania lokal ta risibí e siguiente e-mail: ‘Boso por konfirmá ku ya a hasi un pago? Si no, por hasi pago na nos otro banko na Polonia, manera nos tim finansiero a konsehá pa motibu di e problema fiskal ku ta surgi rondó di nos kuenta banko prinsipal’.

Akinan a manda tur nan datonan i number di kuenta nobo na Polonia, asta e  “swift code” etcetera.

E kompania lokal ta kontesta mesora, ku e promé pago manera kumbiní a keda realisá kaba,  dia 21 di mart 2022, loke ta nifiká ku no por bira e pago bèk.

E kompania lokal ta haña un e-mail komo kontesta, ‘De echo, a kaba di risibí 38.762, 90 € den banko, hopi danki pa esei, pero pa motibu di e problema fiskal, rekohé fondonan lo kosta nos mas, pero ta bon. E saldo di desèmber awor ta 150.075,00 Euro, pero por fabor hasi e siguiente pago disponibel na nos datonan di banko na Polonia.’ Nan ta pidi tambe pa  informá nan ora e siguiente pago tuma lugá?

E loke ku e kompania lokal no tabata sa e momentu ei ta ku nan e-mail adrès a keda di “hack” i e “hackers” nan tabata sa tur kos ku ta pasando.

Dia 31 di mart 2022 e kompania lokal a transferí un suma di 50.000 euro na e kuenta di banko polako menshoná den e e-mailnan di 22 di mart 2022.

Dia 5 di aprel 2022, despues di un e-mail remarkabel na nòmber di e kompania lokal, e kompania ulandes a komuniká telefónikamente ku e kompania lokal pa verifiká orígen i konfiabilidat di e e-mail aki. Esaki tabata motibu ku e kompania ulandes a manda e mail ku nan a risibí di parti di e kompania lokal, kaminda ku e kompania lokal ta duna di konosé ku nan no a manda e mail enkuestion.

Pero dia 14 di aprel 2022, e kompania lokal ta bolbe realisá un pago di 50.000 euro na e kuenta di banko polako.

Dia 15 di aprel 2022, partidonan a komuniká via e-mail tokante e pagonan pendiente, kaminda ku e kompania lokal ta indiká ku nan a hasi dos pago di 50.000 euro riba e kuenta di banko nobo.

E kompania ulandes a kontestá ku e loke ku ta keda menshoná no por ta korekto. Nan a risibí un pago di 38.762, 90 euro.

Esaki tabata momentu ku e kompania lokal, mesora a tuma kontakto ku nan banko pa stòp e transakshon di pago di 14 di aprel 2022.

Akinan a disputa a start, e kompania ulandes a pidi pa e kompania lokal kanselá e kuenta habrí di 157,027.36 euro.

E kompania lokal ta rekonosé e debe ku e tin liber e 50.000 euro ku ya nan a paga na e banko Polako.

E kompania ulandes a laga pone beslag riba kuentanan bankario di e kompania lokal i esaki a bira un disputa hudisial.

Korte a konkluí ku no por pone e kompania ulandes responsabel pa e pago ku a bai robes. Nan no ta responsabel pa e “hacking” ku a tuma lugá. E kompania ulandes ta di opinion ku meskos ku ora nan a ripará un mail straño drenta serka nan di parti di e kompania lokal i ku nan a tuma kontakto telefónikamente mesora ku e kompania lokal. Tabata responsabilidat pa e kompania lokal promé ku hasi un pago na un otro banko anto te na Polonia, mester a verifiká esaki telefónikamente.

Korte a uni nan mes kompletamente ku e kompania ulandes i a obligá e kompania lokal paga e 50.000 euro ku nan a pasa riba e kuenta na Polonia i tambe 10.000 euro na tur tipo di gastu di proseso hudisial. Pues esaki a kosta e kompania lokal 60.000 euro. NOTA: E texto ta scirbi den Papiamento fonetico di Corsou.