Premier Pisas di Corsou: Lo keda traha ku Gabinete Rutte IV riba asuntunan pendiente

WILLEMSTAD - Despues ku gabinete Rutte IV a kai djabièrnè pasa, promé minister Gilmar Pisas ta reakshoná bisando ku Gobièrnu di Kòrsou ta determiná pa mantené un relashon fuerte i konstruktivo ku Gobièrnu Hulandes.

Den su reakshon promé minister Pisas ta indiká ku despues di un aña i mei, dia 7 di yüli último, Gabinete Rutte IV na Hulanda a kai pa motibu di desakuerdo den e gabinete tokante e maneho di asilo ku mester keda ehekutá. Gobièrnu di Kòrsou sinseramente ta lamentá kaida di e gabinete, ku a sosodé nèt na un momento krítiko pa loke ta trata e relashonnan ku tin den Reino.

Segun premier Pisas, durante e periodo di gobernashon di Gabinet Rutte IV, Gabinete Pisas II huntu ku Sekretario di Estado di Asuntu Interno i Relashon den Reino, sra. drs. Alexandra van Huffelen, a traha duru riba un agènda komun pa implementashon di e reformanan manera stipulá den e Pakete Pais i tambe na realisashon di un Akuerdo Mutuo pa kolaborashon den ehekushon di e reformanan, ku ta remplasá e Lei di Reino COHO.

Den último aña, Gabinete Pisas alabes a hinka hopi esfuerso pa yega na implementashon di vários programa di Hulanda, manera e “Nationaal Groeifonds”, e areglo pa Stimulashon di Produkshon di Energia Sostenibel i Transishon di Klima (SDE++), i e areglo di garantia pa ofresé krédito na negoshinan chikí i mediano (BMKB). Tur esaki ku e enfoke riba desaroyo di un ekonomia duradero i pa mehorashon di nos sistema edukashonal a traves di un programa di digitalisashon esensial.

Ademas, segun sr Pisas, a mira hopi avanse den negosiashonnan ku Gobièrnu Hulandes tokante fondonan nesesario disponibel pa invertí den infrastruktura físiko di Korsou. Tambe tin diferente otro programa, proyekto i reforma, manera proyektonan relashoná ku transishon di energia i mehorashon di e aparato gubernamental i servisio na públiko, ku aktualmente den kuadro di e Pakete Pais, ta ser implementá ku sosten di Gobièrnu Hulandes. NOTA: Texto ta scirbi den Papiamento fonetico di Corsou