Segun inspector na Corsou, retiro masal di specialistanan por causa un calamidad

WILLEMSTAD - E siman aki Inspektor di Salubridat a dirigí un karta na hunta di direktiva di CMC relashoná ku e posibel salida di spesialistanan médiko for di hospital, e konsekuensianan i e posibel solushonnan. Segun Inspektor sr. Sirving Keli den su karta, CMC ta duna di konosé ku den e “instrukshon” (aanwijzing) ku el a haña e lo no tin e libertat pa bini ku medionan legal kontra e lei di LNT ku ta pone un máksimo na entrada di spesialistanan. Pero no ta esei ta loke Inspekshon ta pretendé. Inspekshon tin di bisa bon kla ku e demanda pa kuido a subi i riba esei no tin diskushon. Pero si Inspekshon ta konstatá ku tin un diskrepansia entre e sifranan di CMC i e realidat di tur dia.

Por ehèmpel den kaso di operashon na wowo, te ainda Inspekshon ta ser informá ku no ta tuma mas pashènt i ku nan ta ser rekomendá pa bèl bèk despues pa un sita otro aña. Es mas, e tempu di espera den kaso di neurologia no ta 45 dia, pero mas ku 7 luna. Inspekshon no a pidi CMC pa sa e spesialismonan spesífiko, pero e kantidat pa kada disiplina. E ponensia ku, lo no registrá spesialistanan ku ta retirá ta nèt kontrali na e partisipashonnan ku sa hasi regularmente den kaso di spesialismonan ku ta bira skars. Pues CMC sa e kalkulashonnan debidamente.

Mas aleu den e karta Inspektor ta splika ku lo mester bini ku un plan di implementashon pa sa kon ta bai atendé ku un situashon kaminda un kantidat grandi di spesialista ta tuma retiro. Pero teniendo kuenta ku no a entregá un plan dje índole aki na Inspekshon, e último aki no por a atendé. Pero Inspekshon ta hasi un apelashon pa hasi esei mas pronto posibel. Sinembargo, Inspekshon ta konsiderá komo un paso positivo ku CMC lo hasi su propio esfuersonan pa kontinuá ku su plan pa spesialistanan. Inspekshon ta spera ku den esaki lo no kompartí informashonnan personal, aunke ta importante pa sa kiko konkretamente CMC ta bai hasi, pa asina Inspekshon por evaluá ku e ta sufisiente, teniendo kuenta ku e riesgonan ku ta surgi na momentu ku no yena e skarsedat na tempu. Den su resúmen final Inspektor dr. Keli ta bisa ku, na momentu ku e kuido di pashènt kai den otro komo konsekuensia di retiro masal di spesialistanan, e lo ta desastroso i lo por kosta bida di hende i oumentá e gastunan, i esei ta algu ku tantu spesialistanan komo CMC mes a trese dilanti na diferente okashon.

E konsekuensianan ei no ta inventá, pues lo mester hasi tur loke ta posibel pa evitá ku ta yega asina leu. I esei por solamente a base di un antisipashon na tempu dje situashon, monitoriá e situashon i hasi esfuerso pa yena e vakaturanan na tempu. El a splika ku, ningun momentu ta intenshon di Inspekshon pa bai sinta riba stul di direktiva di CMC, pero pa evitá un kalamidat di eskala grandi den sektor di kuido. Konsiderando tur e ponensianan ku el a trese dilanti Inspektor ta di opinion ku e no ta mira motibu pa kita e instrukshon. NOTA: Texto ta scirbi den Papiamento fonetico di Corsou.