Na Corsou, director di Aqualectra, Darick Jonis a entrega su retiro despues di e di dos blackout

WILLEMSTAD - Darick Jonis a disidí ku “e ta bon asina”. Durante 12 aña el a duna su máksimo pa komunidat por a konta ku un bon servisio di Aqualectra, pero awor e lo tene honor na su mes i entregá su retiro komo direktor dje kompania. Esei  por a komprondé ayera den oranan djatardi. A trata di drenta  den kontakto ku sr. Jonis mes pero no a logra, pero di fuentenan hopi yegá na su persona nos a komprondé ku entrega di su retiro ta un echo. E retiro di sr. Jonis ta bini komo konsekuensia di e problemanan ku a surgi último siman aki na Aqualectra. Den un siman di tempu komunidat di Kòrsou a ser konfrontá ku dos “total blackout”.

Den e okashonnan ei, manera komunidat a kustumbrá kaba kuné, a apliká e sistema di “schakel” pa despues restablesé koriente poulatinamente pa henter e isla. E promé “blackout” tabata konsekuensia di destrukshon ku a ser okashoná na un kabel prinsipal durante trabounan di un kontratista riba kaya.

E di dos “blackout” e siman aki tabata konsekuensia di aparatonan ku a kalentá. Echo ta ku e dos susesonan aki a kousa un parálisis kasi kompleto di nos ekonomia, i ainda sin kuantifiká e pèrdida ku a sufri.

Komunidat a kuminsá pidi kuenta i rason naturalmente, i korektamente i di un forma hopi transparente gerensia i téknikonan di e kompania a duna un splikashon di loke a sosodé i kiko lo a bira e siguiente pasonan.

Loke kisas lo por a aselerá e desishon di sr. Jonis pa ku su retiro tabata e deklarashonnan di Minister di Desaroyo Ekonómiko sr. Ruisandro Cijntje, kende no a spar Aqualectra ni su gerensia pa loke a bin ta sosodé. Den un relato di dia ayera mèrdia e mandatario a duna di konosé ku el a pidi kuenta i rason pa loke a bin ta sosodé ku suministro di koriente, i ku e tipo di susesonan aki no ta akseptabel pa e frekuensia ku nan a bin ta tuma lugá. Den e mesun rosea sr. Cijntje a anunsiá ku banda di di sr. Jonis lo tin di nombra un direktor tékniko.

Mester bisa ku e retiro di sr. Jonis a ser tumá ku sintimentunan miksto, den e sentido ku di un banda ta ser bisá ku mester tin konsekuensia mara na lokenan a bin ta sosodé. Interupshon di koriente ta algu na orden di dia. Di otro banda, krítikonan ta di opinion ku no ta hustu ku Jonis mester paga e preis karu asina pa daño ku otronan a okashoná, p situashonnan ku Aqualectra no por a influensiá. NOTA: E raportahe ta scirbi den Papiamento fonetico di Corsou.