Merca a degrada varios destinacion di Caribe competencia di Aruba, na nivel 2 of 3 debi na crimen

WASHINGTON – E hecho cu Departamento di estado Mericano (State Department) recientemente a clasifica algun pais Caribense negativamente mas abou den nivel, por tin cierto 'beneficio'  pa Aruba indirectamente. Comienso di e luna aki Merca a clasifica Republica Dominicana, un competencia di Aruba.  na nivel 2 (for di nivel 1) , pa e aumento di crimen riba e isla. Un luna prome (mei) , a clasifica otro destinacion Caribense popular, Jamaica tambe mas abou, e biaha aki te na nivel 3 pa motibo di aumento serio di crimen riba e isla, y specificamente areanan conoci turisticamente. Mester bisa si cu e isla ey hopi tempo caba tin problema cu crimen y seguridad, pero luna pasa Merca a clasifica e isla aun mas abou. Tur esaki ta negativo pa e islanan aki, y manera e dicho Hulandes ta bisa, ‘de ene zijn dood is de ander zijn brood’, y por yuda Aruba, ya cu e turistanan awor por pensa di bin Aruba envez di e islanan cu a keda categorisa di nivel mas halto negativamente pa motibo di aumento di crimen. Aunke den mesun rosea, mester bisa tambe si cu AHATA a comenta recientemente cu e isla ta birando mas caro, cu ta nifica cu e turistanan por evita Aruba y scohe pa destinacionan mas barata na p.e. Europa. 

NIVEL DI ARUBA

Tabata na October di aña pasa cu Aruba a keda clasifica na nivel 1 cu ta e nivel mas abou posibel (4 ta esun mas halto tempo cu Aruba a keda clasifica pa motibo di pandemia:red) . E nivel ey ta pone cu Mericanonan mester djis ‘eherce precaucion ‘normal’ durante nan bishita na e destinacion aki durante e zomer.