Hueznan di Corte Comun a señala por lo menos 26 ley cu tin buraco

ORANJESTAD – Den por lo menos 26 ley dividi den 6 area, tin buraco segun un lista cu hueznan di Corte Comun a entrega na ministernan di e 4 paisnan den Reino Hulandes aña pasa. E lista ta largo y manera cu noticiacla a raporta recientemente, presidente di Corte Comun mr. Mauritz De Kort a menciona esaki durante un conferencia di prensa recientemente. Mas investigacion di Noticiacla a pone cu nos a pone man riba e lista  largo di deseo di hueznan cu kier pa gobernantenan (lesa: Parlamento) haci cambio necesario. Ta trata leynan cu ta cubri e area di Ley civil, derecho penal, ley administrativo, ley di impuesto y algun area general mas. 

MAS BURACO DEN LEY CIVIL Y ADMINISTRATIVO

Por a nota cu conforme e lista, cu e area unda cu tin mas ‘buraco’ den ley ta den e parti di ley civil y ley administrativo; specificamente 10 y 8 ley respectivamente. Aunke si mira e area di derecho penal, aki mester cambia dos buki pues esaki por confundi poco pa loke ta e cantidad di ley cu mester cambio . Den e parti di derecho penal p.e. , e hueznan kier wak cambio den e buki nobo di Código Proceso Penal, incluyendo e parti di mediacion, e buki di Codigo Penal di islanan BES incluyendo Aruba, Corsou y Sint Maarten. Den ley di impuesto, tin un ley cu ta mira cu tin un buraco cu ta Derecho Procesal Tributario Comun osea Gemeenschappelijk belastingprocesrecht. 

GENERAL

Den e areanan general demas, unda cu tin mas ley cu buraco, tin por lo menos 5 ley cu mester cambia pa cera e posibel buraconan segun e lista. Entre esnan cu a hala atencion ta esun di Ordenanza nacional ley disciplinario medico (medische tuchtraad), di acuerdo cu islanan BES, y Revision di e Ordenanza Nacional di Demente / Legislacion di Admision Obligatorio, osea Herziening Krankzinnigenlandsverordening / Wetgeving dwangopname. Den otro raportahenan, Noticiacla lo amplia mas riba e varios cambionan cu Corte Comun a pidi atencion ariba, mas liher cu ta posibel.