BCA: Activo domestico netto a subi y reserva di divisa netto a baha

ORANJESTAD - Den luna di maart 2023, e cantidad di placa den circulacion a expande cu Afl. 47,7 miyon te na Afl. 5.675,4 miyon, compara cu februari 2023. Esaki a resulta for di un subida den e activo domestico netto (+Afl. 110,8 miyon) y un bahada den e reserva di divisa netto (-Afl 63,2 miyon). Asina Banco Central di Aruba ta bisa den su relato mas nobo. 

E  desaroyo den e activo domestico netto a wordo causa pa subida den transaccionnan no relata na credito (+Afl. 83,8 miyon) y credito domestico (+Afl. 27,1 miyon). E crecemento den credito domestico a resulta for di mas credito bancario netto na e sector publico (+Afl. 28,7 miyon) y menos credito bancario na e sector priva (-Afl. 1,6 miyon). E expancion den credito bancario netto na e sector publico ta wordo atribui na menos deposito di gobierno (-Afl. 28,5 miyon). E bahada den credito bancario na e sector priva  ta resultado di menos credito na consumidor (-Afl. 7,9 miyon) y crecemento den credito na hipoteca pa vivienda (+Afl. 4,9 miyon) y credito na empresa (+Afl. 1,4 miyon). Na maart 2023, e caida den e reserva di divisa netto a wordo causa pa benta netto di divisa di Afl. 406,2 miyon na publico, primordialmente relaciona cu pago pa importacion, interes, dividendo, y pa otro servicionnan. Esaki a wordo pa un gran parti mitiga pa compra netto di divisa di Afl. 343,0 miyon di publico, principalmente relaciona cu entrada for di turismo. 

INFLACION

E nivel general di prijs, cu ta wordo midi door di e indice di prijs di consumo, a registra un subida di 5,9 porciento den e luna di maart 2023 compara cu maart 2022. E contribuyentenan principal na e aumento aki tabata e categorianan  “Vivienda”, “Transporte” y “Cuminda y Bebida No-alcoholico”. Pa loke ta trata e promedio anual di e tasa di inflacion, esaki a registra 6,2 porciento na maart 2023, compara cu 6,1 porciento na februari 2023.

ENTRADA DI GOBIERNO

Entrada total di gobierno a suma Afl. 104,3 miyon na maart 2023, cual ta Afl. 18,0 miyon mas cu e mesun luna di e aña anterior. Esaki a resulta for di un subida den entrada di impuesto (+Afl. 21,3 miyon) y un bahada den entrada no relata na impuesto (-Afl. 3,3 miyon).

E aumento den entrada di impuesto a wordo causa principalmente pa mas entrada for di e asina yama “turnover tax” (B.B.O.,B.A.V.P.) (+Afl. 9,8 miyon), impuesto riba camber di hotel (+Afl. 6,5 miyon), impuesto riba ganashi (+Afl. 3,5 miyon), impuesto riba divisas (+Afl. 1,8 miyon) y impuesto riba importacion (+Afl. 1,2 miyon).