Segun Guarda Costa di Venezuela na 2022, 48 persona a muri purbando di yega islanan ABC

CARACAS – Segun Guardia Costera di Venezuela, na 2022 un total di 48 persona a muri purbando di yega islanan ABC. Asina e portal La Patilla ta raporta. E cifra a keda suministra den e informe anual di e institucion, entrega na Parlamento di Hulanda, via minister Hulandes di defensa Kasja Ollogren. Segun e documento, un 11 persona mas ainda ta registra como ‘desapareci’. E documento no ta specifica e nacionalidad di e personanan aki.   Entre Januari y December 2022, Guardacosta a detene 170 persona cu tabata purba yega e islanan di un forma iregular, sin documentacion cu por a permiti nan keda. Tambe ta mustra cu e trafico of contrabanda di persona a aumenta na 2022 compara cu e añanan anterior, ora cu a relaha e control implanta pa asina impedi e extencion di Covid19. “E cantidad di migrante indocumenta haya pa Guarda Costa tabata mas cu na 2021. Como tal e ministerio di defensa Hulandes a recomenda un monitoreo mas preciso di hende rescata den e area di servicio aeronautica di rescate (SAR), cu ta yega e islanan den forma independiente, y ta muri of disparce’. E mesun rapport ta indica cu den henter e Cuenca di Caribe, 287 persona a disparce aña pasa so.