Wever: Gobierno no ta autorisa pa tuma decision relaciona cu otorgamento di tereno

Wever: Gobierno no ta autorisa pa tuma decision relaciona cu otorgamento di tereno

Posted on 05/22/2023 11:41 pm AST | Updated on 05/23/2023 7:43 am AST

ORANJESTAD -  Gobierno no ta autorisa pa tuma decision relaciona cu otorgamento di tereno.  Asina prome minister Evelyn Wever Croes a bisa dialuna durante conferencia di prensa di Gobierno di Aruba, elaborando riba e topico di peticion y otorgamento di tereno. Segun Prome Minister a splica, desde cu a sali e noticia cu e director di Directie Infrastructuur en Planning (DIP), ta ausente temporalemente, ta ricibiendo un avalanche di yamada y bishita di ciudadanonan pidiendo ayudo cu otorgamento of peticion di tereno. 

Prome Minister a indica di ta consciente di e situacion aki, na unda cu peticionnan no ta wordo atendi debidamente. Esaki ta un situacion frustrante pero lamentablemente, Gobierno no por haci nada al respecto. Manera ta conoci na aña 2020, como Minister di Infrastructura a traspasa e autoridad pa loke ta otorgamente di tereno, na un team di 4 persona, di cual ta inclui e director y e director suplente. Desde e aña ey, nan ta encarga pa tuma decisionnan riba tur peticion di tereno. Actualmente e enfasis ta pa elimina tur e atrasonan cu tin na DIP,  ya asina tur persona cu a  haci un peticion pa tereno, por haya un contesta lo mas lihe posibel. 

"Nos como Gobierno no por tuma decision ken si y ken no ta haya tereno, ni ken ta prome cu otro. Esaki ta contra regla. Loke si nos tin como exigencia ta pa elimina e atraso cu tin actualmente. E meta ta pa a traves di DIP nos motiva y stimula e desaroyo cu ta necesario aki na Aruba", Prome Minister a expresa. 

  • Aruba a firma acuerdo financiero pa ricibi 14.2 million Euro durante e Foro LGO-E

    Aruba a firma acuerdo financiero pa ricibi 14.2 million Euro durante e Foro LGO-E

    ORANJESTAD - Durante di e LGO-EU Forum dia 29 di februari 2024 cu a tuma lugar na Brussel, Minister Geoffrey Wever a firma como Territorial Authorizing Officer pa Aruba na EU, e Acuerdo  Financiero pa e programa pa digitalsacion di Gobiero pa e implementacion di e eGoverment roadmap, pa un total di 14.2 million Euro.

  • FIFA a certifica Compleho Deportivo Guillermo Prospero Trinidad oficialmente!

     FIFA a certifica Compleho Deportivo Guillermo Prospero Trinidad oficialmente!

    ORANJESTAD- E federacion internacional di futbol, FIFA a certifica Compleho Deportivo Guillermo Prospero Trinidad oficialmente! Asina minister di deporte Endy Croes a confirma diahuebs atardi. E mandatario a elabora riba e avancenan di e proyecto di renobacion di stadion Compleho Deportivo Guillermo Prospero Trinidad na Dakota. E renobacion di e stadion ta den e fase final di construccion. Manera ta conoci, e mandatario di Deporte a ricibi e bon noticia cu e yerba artificial (turf) nobo cu a instala aña pasa a keda aproba pa FIFA. Na luna di september 2023, Sportslab tabata na Aruba unda cu a haci tur e testnan necesario y a bay bek cu esaki nan Canada. Recientemente, FIFA a informa cu e yerba artificial (turf) a pasa tur e testnan di acuerdo cu e reglanan di FIFA. FIFA a publica e acreditacion di e cancha di futbol riba nan website. Minister Endy Croes a expresa cu e ta hopi contento di ricibi e informacion aki. E documentonan oficial ta na caminda pa Aruba, mientrastanto e trabounan a continua na e stadion. Na e momento aki, a cuminsa cu e renobacion di e “track and field”, a desmantela e atletiekbaan y lo aloca e marca MONDO, esaki lo sosode den luna di maart y april. Tambe, den luna di maart lo baha tur e luznan y pa fin di april ta asina leu cu e stadion ta bay tin luz di 800 lux. Pues, un veld cu ta cumpli cu e standard internacional di FIFA. Minister Endy Croes ta pidi un poco mas di pasenshi dentro di tres luna e proyecto ta completamente finalisa. Por ultimo, Minister Endy Croes a duna primicia cu dia 8 di juni proximo Seleccion di Curaçao lo enfrenta Seleccion di Aruba den e wega clasificatorio di CONCACAF y probablemente e dia aki lo inaugura e stadion. 

  • Lo converti ex-edificio di Ministerio Publico den apartamento pa studiante

    Lo converti ex-edificio di Ministerio Publico den apartamento pa studiante

    ORANJESTAD - Ayera, 28 di februari, Gobierno di Aruba, oficialmente a inicia e proceso pa transforma e ex-edificio di Ministerio Publico (OM) den Oranjestad den un compleho di apartamento pa studiante, como parti di diferente iniciativanan di Gobierno di Aruba pa revitalisa e centro di Oranjestad. 

  • Prome minister di Aruba a tuma e encargo di presidente di OCTA

     Prome minister di Aruba a tuma e encargo di presidente di OCTA

    ORANJESTAD - Diaranson mainta, durante e conferencia ministerial di OCTA, na Bruselas, Prome Minister Evelyn Wever-Croes a tuma over e presidencia di OCTA di Minister di Relacion Exterior di Groenland Vivian Motzfeldt. OCTA ta un asociacion di 13 pais y teritorio na ultramar di Union Europeo: Aruba, Bonaire, Corsou, Saba, Sint Eustatius, Sint Maarten, French Polynesia, New Caledonia, Sint Barths, Saint Pierre et Miquelon, TAAF en Wallis and Futuna, y Groenland.

  • Minister kier haci “Culinary Fusion Plaza” un realidad den centro di ciudad

    Minister kier haci “Culinary Fusion Plaza” un realidad den centro di ciudad

    ORANJESTAD - Plaza Comercio ta e plaza cu Minister Geoffrey Wever kier converti den un Plaza Culinario. Aki diferente restaurant ta bini huntu den aire liber pa ofrece un experiencia culinario di calidad, acompaña pa arte y musica. E meta ta pa contribui na diversification di e experiencia ofreci na tur cu ta bishita y frecuenta Oranjestad. 

  • Muchanan di scol preparatorio a ricibi nan premio pa e concurso di kleur “Stima bo mascota 2023”

    Muchanan di scol preparatorio a ricibi nan premio pa e concurso di kleur “Stima bo mascota 2023”

    ORANJESTAD-  Muchanan contento di scol preparatorio a ricibi nan premio pa e concurso di kleur “Stima bo mascota 2023”. Na aña 2019 Minister-President Evelyn Wever – Croes a laga diseña un Plan Nacional pa atende cu e sobrepopulacion di cachonan na nos isla. Mesun aña a lansa e prome Concurso di Pintamento pa scolnan basico. E aña siguiente tabata e prome biaha cu a inclui scol preparatorio den e concursonan di pintamento, pa nan tambe siña di Aruba su Ley di Cacho. Na 2021 tabata e prome aña cu a organisa un concurso pa scol basico los di esun pa scol preparatorio. E aña ey a ricibi mas cu 100 pintura di e scolnan preparatorio. E aña aki ta di 2 biaha cu ta organisa e concursonan separa y Minister di Enseñansa Endy Croes a lansa y carga ambos proyecto. Na e Concurso di Pintamento 1222 alumno a participa y na e Concurso di Kleur 423 alumno. Un exito total! Muchanan di kleuter tabatin te dia 5 di december pa entrega nan pinturanan y dia 18 di december ya caba a anuncia e 15 ganadonan riba e pagina di Facebook di Stima Mi Mascota, riba e pagina di Facebook di Gabinete Wever-Croes y tambe via e-mail di tur scol. “Nos a dicidi di warda pa Pasco y Carnaval pasa, pa por duna e alumnonan nan momento special”, Minister Endy Croes a comparti. Dia 23 di februari tur 15 ganado a wordo invita pa bini Bestuurskantoor pa nan ricibi nan regalito. Ademas di e 15 muchanan y nan mayornan, nos Minister-President Evelyn Wever – Croes tambe tabata presente y tambe Señor Armando Goedgedrag cu ta esun cu a diseña e imagen cu e muchanan a kleur pa ambos concurso “Stima Bo Mascota” 2021 y 2023. Tambe 3 representante di scol a bini pa ricibi un certificado di reconocemento pa e gran participacion na e concurso educativo na bienestar di nos mascotanan. Trupial kleuterschool a keda na prome luga cu 89 participante, Mon Plaisir kleuterschool y Rayo di Solo kleuterschool a comparti luga number 2 cu 71 participante cada uno.

  • Zulo
  • Varadero
  • Powered by SETAR