AP: Peru lo extradita Joran vd Sloot temporalmente pa Merca pa extorsion

LIMA – Peru tin planea di extradita Joran vd Sloot temporalmente pa Merca pa e wordo persigui pa e caso di extorsion cu tin contra dje den caso di e desaparicion di Natalee Holloway na 2005 na Aruba. Asina e agencia di prensa internacional Associated Press ta raporta y prensa Mericano y Hulandes ta sigui raporta diahuebs marduga.. Vd Sloot ainda ta e sospechoso principal di e desaparicion di Holloway. E intencion ta pa despues cu Merca trata e caso ey di extorsion, pa transporta vd Sloot bek pa Peru pa e caba sinta su castigo di 25 aña pa asesinato contra Stephany Flores na 2010 eynan. 

EXTORSION Y TRATADO

Peru tin un tratado cu Merca cu ta haci posibel cu un sospechoso por wordo extradita temporalmente pa tratamento di un caso den un otro pais, den e caso aki pues Merca. E tratado ta stipula si cu despues cu trata e sospechoso pa e caso, e sospechoso wordo transporta bek pa e pais pa e continua sinta e castigo cu e persona ta sintando. 

BETH TWITTY

E mama di Natalee, esta Beth Twitty, a duna un declaracion breve despues di e anuncio di e extradicion temporal. “Porfin nos ta haya husticia pa Natalee” e ta scirbi den un declaracion emiti. “E perseverancia di hopi lo produci algo!” Den e declaracion e ta recorda con 18 aña pasa e aña aki ta recorda con su yiu a desaparece na Aruba, y nunca mas a wordo haya. “Awor, net 18 aña despues, e culpabel, Joran vd Sloot, a wordo extradita pa Birmingham pa para responsabel pa su crimenan”. E la gradici e.o e presidente di Peru Dina Boluarte, comunidad di Peru, famia di Stephany Flores y su abogadonan pa e noticia aki. 

KI ORA E EXTRADICION LO TUMA LUGAR

Mientras cu tanto prensa Hulandes como Mericano ta raporta e noticia aki, no ta conoci exactamente ki dia e extradicion aki lo tuma lugar. A compronde cu vd Sloot su abogado lo bringa esaki. Embahada Peruano na Washington a bisa e agencia di prensa AP cu un orden ehecutivo ta permiti pa vd Sloot wordo extradita temporalmente.