- Departamento di Progreso Laboral (DPL) cu campaña pa entrega Formulario AMR 2023 den luna di Juni 2023
- Directie Financiën ta informa di e condicionan ora di trata cu cobransa pa instancianan di Gobierno
- Foyeto Abo ta bay studia dentro di poco na Hulanda – con pa registra den BRP
- DUCAPRO a presenta un plan pa promove e industria creativo y proteha e artistanan
- E prome barco di fruta y berdura di Venezuela ta yega Aruba dialuna awor
Arnhem: “Tres aña enberdad ta poco cortico (pa caba e trabou di Korpschef)”
ORANJESTAD – “Si mi mester ta hopi honesto y mira e trabou cu ta bin riba nos, enberdad 3 aña ta poco cortico”. Asina e hefe maximo di Cuerpo Policial di Aruba Ramon Arnhem a admiti na noticiacla.com dialuna mainta, riba e tempo cu e tin pa e eherce su trabou te ora su contracto vence. Ta conoci cu Arnhem a reemplasa hefe di polis Vanessa Tjon Kock ora cu su casa Rocco Tjon a bira minister di husticia na 2021. Awor ta resulta cu esaki lo ta pa mientras cu Tjon ta minister, su casa keda na banda te ora cu no mester mas, y e ora e (e ex hefe di polis) por bin bek. E ultimo aki no ta confirma pero tin rumornan persistente riba e tema aki.
TRES AÑA DI TRABOU
Segun Arnhem, mientras cu e ta admiti cu 3 aña ta cortico, nan lo move cos pa tin sikiera un movecion den e plannan pendiente. E ta admiti cu ora cu e la tuma e trabou, e no tabatin un idea di kico ta spere. Ora cu e la cuminsa, e la haci un investigacion interno y awor e sa kico ta e loke mester haci. Y e hecho cu aunke no tin suficiente tempo, e ‘lo haci lo mihor cu por”. Como cu e no a cuminsa cu un planning, no ta cuestion awor cu e mester adapta e plan. “Mi no ta bay corta nada di e calidad di e trabou”. Como prioridad number uno, Arnhem ta pone e esencia di liderazgo di e hendenan. “Cu e ciudadano haya e confiansa atrobe (den e cuerpo:red), cu e ciudadano haya un perspectiva, sinti su mes sigur, y cu e ta sinti su mes bon” Arnhem a bisa. E ta bisa cu e ta aclimatisa y ta sinti su mes hopi bon na Aruba y lo kier mas tempo pa por termina su trabou. “Esaki ta mi hendenan (refiriendo na e cuerpo:red). E ta sinti su mes bon cu e cuerpo, motivacion, etc tur ta hopi positivo, segun Arnhem.
Wardacosta mester a tira riba boto cu indocumentado pa para nan di drenta Aruba!
ORANJESTAD - Diabierna ultimo Wardacosta, den colaboracion cu Cuerpo Policial Aruba, a logra intercepta un boto riba lama. Despues cu a detecta e boto sospechoso, e Centro di Operacion Maritimo di Wardacsota a dirigi un boto di patruya Metal Shark pa e sitio. Tambe a pidi asistencia di e helicopter di KPA durante e accion riba lama. Pa a logra stop e boto personal di Wardacosta a los na prome instante algun tiro di advertencia. Como cu e capitan di e boto no kier a duna oido na e diferente advertencianan di Wardacosta pa para e boto, e personal di Wardacosta a los tiru dirigi riba e motornan di e boto pa por obliga para esaki. Despues di a logra intercepta e boto a haya na bordo 3 hende homber di e nacionalidad Venezolano. Wardacosta a entrega e 3 hombernan na KPA y e caso lo sigui den investigacion.
Polisnan na Aruba ta bay cuminsa bisti bodycam den un proyecto piloto
ORANJESTAD - Dialuna mainta, durante conferencia di prensa di Gobierno di Aruba, Minister di Husticia . Rocco Tjon, a anuncia e inicio di e proyecto piloto di bodycamaras pa henter Cuerpo Policial di Aruba. Manera ta conoci, a base di e plan di maneho di Ministerio di Husticia y Asuntonan Social, deliberadamente a scoge pa inverti den tecnologia. Tecnologia pa eleva siguridad pa henter comunidad, pero tambe pa e Agente Policial mes. Asina, a base di diferente investigacionnan cientifico a yega na e conclusion pa bin cu e proyecto piloto di bodycamaras pa e Agentenan Policial, di cual lo haci un evaluacion dentro di tres pa seis luna, pa asina mira su efecto y tuma un decision si ta bay implementa esaki permanentemente.
Aruba ta conoce su di dos morto di trafico riba e mesun diadomingo!
SAVANETA – Den un solo marduga Aruba a conoce 2 morto di trafico tras di otro. E prome tabata pa algo despues di 3or awe marduga y e di dos pa 6'or. Tabata awe diadomingo mainta 5 minuut pasa di 6 cu Central di polis a wordo yama pa un accidente frontal entre dos auto na altura di Wintergarden na Savaneta. Ora cu polis a yega a topa cu chauffeur di un KIA Rio A-62040 a dal frontal contra e truck di diesel A 1280. E KIA Rio segun vocero policial Liliana Rasmijn, lo a baha di caminda pa un motibo desconoci y topa frontal cu e truck. Pa 6 or y 50, dr Mungra a constata morto di e hoben chauffeur di apenas 17 aña di e KIA Rio. No a duna nomber ainda di e victima, pasobra mester a notifica famia ainda. Cu e morto aki, e cantidad di morto di trafico pa 2023 ta bira 4. Noticiacla ta manda palabra di condolencia na famia di e fayecido.
Aruba ta conoce su di 3 morto di trafico pa 2023
ORANJESTAD - Aruba a conoce su di tres morto di trafico pa 2023. Diadomingo madruga pa 03:25am central di polis a. wordo notifica di un accidente basta grave na altura di ex House of Cheng. Na yegada di patruya, a bin encontra cu un Nissan March color shinishi numera A- 65717 pega riba un mata. Patruya tambe a bin topa cu cuidadanonan cu a purba di re-anima e victima. Tambe Ambulance a yega na e sitio y a haci nan maximo esfuerso pero no por a haci nada mas pa e victima. Pa 4:09 am Dr.Mungra ta constata morto di Ray Kelvin Zambrano Burgos naci 18 december 1996 na Aruba.Polis di trafico y polis technico a presenta na e sitio pa haci nan investigacion. Slachtofferhulp tambe a presenta na e sitio pa brinda sosten na famia di e fayecido. NoticiaCla y Cuerpo Policial ta manda palabra di profundo condolencia na famia di e fayecido y deseanan forza den e dianan nos dilanti.
Turista a bira malo riba beach banda di Divi Phoenix y fayece
Bapor di guera Hulandes y Wardacosta a intercepta go-fast ku 500 kilo di contrabanda
ORANJESTAD - E barku di Marina Real, Zr.Ms. Groningen ku ta nabegando pa Wardakosta Karibe Hulandes, den mardugá di 22 pa 23 di mei último a interseptá un transporte di droga riba laman Karibe. Zr.Ms. Groningen ku apenas tabata 24 ora riba laman ku su patruya a keda informá pa Wardakosta Karibe Hulandes tokante un go-fast sospechoso. Groningen a lansa e dos botonan rápido mesora, e asina yamá FRISC, pa por stòp e go-fast. E kuater sospechosonan riba e go-fast a keda kompletamente sorprendé i a entregá nan mes inmediatamente. E kaptura aki un biaha mas ta e resultado di un kolaborashon intensivo huntu ku Wardakosta Karibe Hulandes i e barku patruyero di Marina Real Hulandes, ku tin a bordo un ekipo di ‘Fleet Marine Squadron. E sospechosonan i e kontrabanda a keda entregá na Wardakosta Karibe Hulandes despues di e interseptashon. Un total di aproksimandamente 500 kilo di marihuana a keda konfiská kual entretantu a keda destruí.
Follow NoticiaCla
