Monique van Wilgen como 1e waarnemer ta na cabes di DIMAS por lo pronto

ORANJESTAD – Mientras cu e directora actual di DIMAS, mr. Kathy Paskel ta suspendi na cas pa 3 luna, despues cu e la haya un carta di minister Glenbert Croes di toegangontzegging, su funcion ta den man awor di e asina yama 1e waarnemer, osea reemplasante, Monique van Wilgen (55). Noticiacla a compronde cu ta normal cu van Wilgen, como 1e waarnemer, ta tuma over automaticamente ora cu e director ta ausente, sea pa vacantie of malesa. Y mirando cu sra Paskel tabata cu vacantie, van Wilgen tabata na su lugar un rato caba. Mirando cu ta 3 luna e ontzegging ta dura, e temporada aki, van Wilgen lo ta continua na cabez. E ta un hurista cu hopi experiencia riba e trabou, E ta tuma over ora Kathy ta ausente dus vakantie of malo. Aworaki cu e situacion actual e la keda 1e waarnemer, wardando kico lo bay pasa.

E CASO

Tabata diasabra cu e portal aki a raporta cu , mientras cu e directora di DIMAS tabata di vacacion, minister Croes a dicidi di manda un carta na oficina di Paskel, den forma di un ‘toegangontzegging’. E motibo pa cual e mandatario a manda e carta y e prohibicion pa entrada, no ta conoci. Pero ta conoci cu no ta prome biaha cu e mandatario tin problema cu e directora y cu den pasado (aña pasa) caba tabatin un situacion unda cu e directora hasta mester a bay corte pa bringa e mandatario, ora cu e minister a dicidi cu ta kita cierto poder di e directora. E por a keda den funcion pero no tabatin autoridad. E directora a hiba e mandatario corte y tabata na mei di aña pasa cu huez a revoca e decision di e minister e tempo ey pa kita poder di e directora. E caso ey a pone cu e directora por a keda traha den su funcion, ya cu no a haya nada malo di parti di e directora. For di masha tempo e minister ta buscando problema cu e directora, y a cita varios asunto cu segun e minister, ta malo. Entre nan, cu e directora no ta cumpli cu cierto orden di dje y cu supuestamente e no por maneha e departamento. E directora den varios instancia a mustra cu esaki no ta berdad y cu si tin problema, esaki no ta bin pa motibo di su maneho. Pa loke ta e carta nobo aki pues,e ta bisa cu e directora a haya prohibicion di entrada pa un periodo di por lo menos 3 luna. Mientrastanto e departamento ta keda den encargo di otro persona.