CAFt: Mester hinca efecto di e stop di recorte den cuido, den un presupuesto adapta

ORANJESTAD –E supuesto decision (di gobierno di Aruba di stop e recorte di 5.5% unilateramente den sector di cuido: red) den ausencia di medida compensatorio, lo conduci na perdida di spaarmento (di gasto) y por lo tanto, afecta e resultado di AZV”. Asina e colegio di supervision di Aruba, esta CAFt a bisa noticiacla.com e siman aki den nan prome reaccion riba e asunto di para e recorte menciona. Gobierno mientrastanto a sigura e portal aki di a informa tanto CAFt como gobierno Hulandes di su decision, pero no a haya un reaccion ainda. CAFt pa motibo di nan maneho interno, no por bisa e portal aki si nan a contesta gobierno caba. Mientrastanto, gobierno di Hulanda a informa e portal aki awe mainta cu pa otro siman nan lo tin un reaccion. 

GOBIERNO A INFORMA CAFT

Ora cu Noticiacla na fin di luna pasa (April 2023), a bin cu e primicia di e noticia di e eliminacion unilateral di e recorte di 5.5% den cuido (e siman aki mientrastanto nan a anuncia esaki oficialmente: red), e minister encarga Dangui Oduber, a bisa e portal mesora tambe cu: ” Nos a informa CAFT di e decision aki y nos a splica nan cu no tin base legal y tampoco hustificacion mas pa mantene e recorte aki”. Durante un conferencia di prensa e siman aki riba e tema, e mandatario a confirma tambe cu ‘ainda no a haya un reaccion di Hulanda”.

CAFt TA POSITIVO SEGUN ARUBA

Riba e pagina di Facebook di e minister mientrastanto, e mandatario ta splica cu desde januari 2023 cu a reuni cu CAFT, a mustra nan e situacion y nan tambe a mustra mas comprension pa e situacion den cuido medico. “CAFT a aplaudi e hecho cu Ministerio di Salud Publico y AZV ta haciendo nan parti pa maneha e gastonan di cuido mihor” e mandatario a sigui bisa. 

Minister Oduber a indica cu a splica CAFT cu Aruba tin un plan pa futuro cu ta demostra con lo maneha e gastonan di cuido! E deseo ta pa para e recorte di 60 miyon florin y bai over na un perspectiva di un plan multi-anual . 

E mandatario a sigui bisa cu gobierno di Aruba ta preparando un estimacion di e plan multi-anual pa asina fin di luna di juni 2023 comparti esaki cu CAFT. Den esaki Aruba ta bay haci uzo di un economista specialisa den cuido cu lo bay yuda cu tur e calculonan necesario.

CAFT NA E PORTAL

Den un reaccion inicial e siman aki na noticiacla, e consecuencia presupuestario (di e cambio di maneho aki) mester wordo incorpora den un presupuesto adapta. “CAFt e ora lo evalua e codigo civil di conformidad di e ley integralmente (LAFt y e Protocol). Esaki pa sigura cu gobierno di Aruba ta actuando conforme e reglanan stipula. Conforme e  maneho di CAFt, nan a splica tambe cu no ta duna comentario riba e corespondencia cu e ta sostene cu partidonan (den e caso aki Gobierno:red), sino solamente corespondencia cu ta bira publico ora cu publica esaki riba nan propio portal.