Arends: Aruparking ta activo atrobe awe, y no ta usa klem mas

ORANJESTAD – Pagamento pa parkeo ta activo atrobe entrante awe 2 di mei, 2023. Minister di transporte Ursell Arends a confirma esaki diamars atardi den un conferencia di prensa oficialmente. Refiriendo na 7 punto cardinal di operacion, e mandatario a splica cu entrante awe, e area di parkeer cu ta marca, lo mester paga p’e, conforme e lugar y e tipo di cliente cu ta usa e lugar. Loke ta resalta, ta cu contrario na antes, si no cumpli cu e regla di parkeer, lo no klem e auto en cuestion, sino lo multa esaki den un diferente forma. Tambe, e mandatario a sigura cu e concepto di paga pa parkeer, tin ‘motibo di existencia’, basa riba varios raport traha y publica. Mes momento a confirma tambe si cu e intencion ta pa den futuro, Aruparking lo pasa pa un compania priva, pues lo saca esaki for di man di gobierno, conforme e palabracion haci cu e.o. Colegio di Supervision Financiero di Aruba CAFT. Tambe a splica cu awor tin 1651 lugar marca pa parkeo, pero tambe tin 440 espacio liber di parkeer, cu ta 28% di e totalidad di lugar di parkeer den Oranjestad. 

E CONCEPTO

E prome punto ilustra ta cu e klem ta pa pasado. Tur esnan cu comete un infraccion, lo haya un sticker pega riba nan bentana, y e di dos infraccion lo ta un multa pa cual ta haya dianan pa paga e multa. Si no cumpli cu esaki, lo manda e recibo cas, y si ainda no kier paga, lo manda colecta esaki y e persona en cuestion lo carga e gastonan pa esaki. E multa ta cuminsa na 75 florin pa a viola esaki. A menciona cu pa compensa un parti di comunidad cu no tin e medio financiero fuerte, a pone 440 lugar gratis di parkeer, unda cu na Arubus so tin 236 lugar gratis. Ademas tin 24 lugar di parkeer gratis y pa persona adulto mayor, esnan na estado, y of tin un of otro forma di desabilidad. A recomenda pa acudi na aruparking pa registra online pa por bin na remarke pa e permisonan aki. Lugarnan cu tin riba LG Smith, Arubus y rond di ciudad. E forma di paga pa parkeer ta entre otro via e app di Setar esta Pay.aw, of un debit card di banconan Banco di Caribe, Aruba Bank y cualkier tipo di credit card y tambe cash. E smart card lo no ta vigente mas pues tin cu check cu Aruparking pa yega na un acuerdo pa elimina esaki. Tambe tin e posibilidad pa paga pa un rato chikito, esta e Stop and GO, unda cu ta paga 1 florin pa 30 minuut, envez di e regular 2 florin pa ora. Loke hopi por a nota tambe cu a elimina e lugarnan di parkeer geel y a haci tur blanco, pa asina mas hende por usa esaki. E personal di controle lo traha di 9am te 7pm y si para prome cu esey, lo e por ta pornada of despues di 7pm. Tin tambe esnan cu ta haya un permiso special esta e Bijzonder Parkeer Vergunning, cu ta pa companianan cu ta haci servicio di delivery cu por haya un permiso special pa parkeer y continua cu e negoshi den centro di ciudad.