ELMAR: Prijs di coriente ta baha, paso tarifa di compra cu ELMAR ta paga WEB, a baha

ORANJESTAD  – Gerencia di ELMAR dialuna a confirma e noticia di gobierno di diabierna riba e reduccion di tarifa di coriente, cu ta cu entrante 1 di mei 2023, e prijs di coriente ta baha cu 7.1%. Segun ELMAR, e reduccion aki a bira posibel debi cu e tarifa di compra di energia cu ELMAR ta paga na WEB a baha.

AUMENTO NA 2022

Segun ELMAR, na 2022, nan a anuncia un aumento di prijs di coriente debi na factornan internacional fuera di nan control cu a influencia e costo di generacion di energia substancialmente. “Sinembargo awor cu nos a logra negocia un miho tarifa di compra di energia for di WEB, esaki a crea e espacio suficiente cu ta permiti ELMAR baha e prijs di coriente pa consumidornan. ELMAR ta cumpra e energia cu WEB ta genera pa asina ELMAR por transmiti y distribui e coriente den tur bario di Aruba”.

COMPRENSION

ELMAR tin comprension pa e impacto cu e aumento di prijs por tin riba presupuesto di cada persona of famia, y ta spera cu e reduccion aki lo duna algun alivio. ELMAR a pidi comunidad tuma nota di e siguiente tabel cu ta indica e prijs nobo di coriente.