Parlamentario Gerlien Croes a atende reunion di Parlamento como miembro di AVP

ORANJESTAD – Mientras cu ex colega di partido AVP, Ryçond Santos Do Nascimento a sinta separa di AVP como parlamentario independiente, e otro candidato cu tabatin problema cu e partido berde, Gerlien Croes si a opta pa keda ainda cu partido AVP y a sinta den e fila di e partido berde dialuna mainta. E la yega un poco laat, pero mesora a bay ubica su mes cu e partido berde. Croes siman pasa ainda, durante un conferencia di prensa, a confirma cu e partido berde algun dia prome a humilia su persona y falta e respet pa e forma di trat’e durante un reunion pa dicidi futuro di colega di partido Benny Sevinger. E tabatin problema tambe cu e partido pa declaracionan haci pa colega di partido Mike de Meza algun siman prome, unda cu hunto cu awor ex colega di partido Do Nascimento, e exigi despensa di de Meza pa declaracionan haci cu a mustra malo pa Croes tambe. E despensa no a bin y Do Nascimento a retira. Hopi a pensa cu Croes tambe lo a tuma e mesun rumbo, pero esaki no a bira e caso. Croes pues no a tuma e paso ey, y a confirma pa Noticiacla cu mientras cu e ta analisando su siguiente paso, si e ta keda of no, e lo sigui presenta na trabou, y den e caso aki, cu partido AVP. Y dialuna mainta esaki a keda confirma tambe cu su presencia den Parlamento. Mes momento e unico persona di AVP cu a cuminde, tabata colega Mervin Wyatt Ras. No ta conoci si despues e otronan lo bay cuminde. Tambe tabatin momento cu Rycond Santos do Nascimento, a bay cuminda su colega despues.