Gerlien Croes: Decepciona y humilia, pero ainda e no sa si e ta retira

ORANJESTAD – Desiluciona, decepciona, humilia y defama, ta palabranan cu miembro di partido AVP, Gerlien Croes a usa pa describi su sentimento despues di e reunion di partido (partijbijeenkomst) dialuna anochi unda cu a dicidi cu colega di partido Benny Sevinger ta keda como Parlamentario aunke cu e la haya un condena di prizon. Mes momento Croes a bisa cu e no tabata cla pa dicidi si e ta keda cu e partido, no obstante tur e palabranan cu e la usa pa describi su sentimento. Pa Noticiacla e la sigura cu e ta un miembro di partido ainda, y lo presenta na trabou te ora cu cos cambia, si esaki ta e caso. 

MAS TEMPO

Segun Croes, e la wordo pidi pa un reunion diaranson unda cu e la papia cu e lider di e partido Mike Eman. Despues di esaki, e la haya ta necesario pa reuni cu su famia y sostenedornan awor, prome cu e dicidi su siguiente paso. E ta conciente cu e tabata un reunion emocional, aunke e no kier a bisa e contenido di e reunion y ki pensamento e la keda cu ne of si e la haya aclaracion di e lider pa cu e actuacion contra Croes. Cu esaki, e kier men, pakico e no a wordo invita pa e reunion di dialuna, siendo cu e ta un miembro integral, parlamentario y te hasta lider di fraccion pa e partido. E ultimo aki a pone cu e ta sintie huyima y defrauda. 

OPCION

Tampoco Croes tabata cla pa entretene e posibilidadnan su dilanti, esta cu si e ta keda cu e partido, si e ta sali bira independiente, of ta sali y entrega su asiento, y of si e ta cuminsa su partido nobo. E conferencia mas bien ta mustra cu e kier a djis duna un ‘update’ di kico ta kico, pero no pa haci e anuncio cu hopi a spera, esta si e ta keda of sali di e partido.

HUNTO CU RYÇONMientras cu tabata Ryçon Santos do Nacsimento cu a haci e mencion di dje y Croes tabata kier un disculpa publico pa e forma con colega di partido Mike de Meza a trata nan dos durante un reunion algun siman pasa riba asunto di ley pa cubri ex minister Edison Briesen pa un contracto pa cual e ta wordo demanda awor. Do Nascimento a para firme y ora cu dialuna e la tuma nota di e decision di partido pa sostene Sevinger, e la dicidi eynan, cu e no ta keda y ta retira. Un dia despues e la anuncia esaki publicamente. Colega Gerlien Croes, cu tabata su ‘partner’ politico den e crisis aki, sinembargo no a bay den e mesun direccion, cu ta indica cu nan situacion toch ta un poco diferente y cu resultado di e decision di Do Nascimento, no necesariamente ta esun cu Croes lo tuma awor. Ki dia Croes lo dicidi su siguiente paso, no ta conoci. Tempo lo bisa.