Comediante Colombiano tampoco por a drenta Aruba pa presenta den weekend

ORANJESTAD – Prensa Venezolano y Colombiano den fin di siman a duna hopi atencion den fin di siman na e noticia cu un di e comediantenan mas conoci di Colombia, Jhovanoty no a wordo permiti pa drenta Aruba den fin di siman pa presenta den un show. Pues no ta solamente dos cantante internacional no a keda permiti pa drenta Aruba den fin di siman, sino tambe e comediante hopi conoci Colombiano. E artista Jhovanoty den un video riba su pagina di Instagram, a raporta cu e la yega Aruba 10’or di mainta y mester a keda 8 ora pega na aeropuerto di Aruba sin por drenta. E ta argumenta cu den su 17 aña di carera professional, nunca esaki a sosode, siendo cu e la biaha rond di mundo, incluyendo paisnan manera Australia. E ta raporta cu e la topa cu e artistananYeison Jiménez y Elder Dayan Diaz.  Segun e comediante, e impresario a sigura cu tur cos tabata regla, tur cos tabata paga, pero asina mes imigracion no a permiti nan di drenta e pais. E noticia a plama grandement na Colombia y Venezuela y por lo menos 6 medio Latino a raporta esaki den e fin di siman aki na Venezuela y Colombia.

DIMAS

For di DIMAS, Noticiacla a compronde cu e problema aki tabata cu mientras cu e promotor di e evento a pidi permiso na tempo, e problema ta cu e la paga esaki (esta e permiso) laat, cu a pone cu e proceso a keda pega. E peticion di di permiso a keda entrega dia 31 di maar ultimo, y e orden pa paga e permiso a sali mesun dia. Segun DIMAS, aki ta unda e persona a faya, ya cu e la paga e permiso te dia 14 di April, un dia prome cu e evento. Y esaki (e pago) ta dura 2 dia pa keda procesa. Y tanten cu esaki no ta cla, e persona no por drenta. Como tal segun DIMAS, e promotornan a tuma un riesgo innecesario. “Ningun peticion di permiso ta cuminsa cana den e proceso, si e pago no wordo ricibi. E sistema no ta lague” ta loke e vocero di DIMAS, Marilyn Wout a sigui bisa.