Premier di Aruba a reuni cu premier di Hulanda riba e.o. pago bek di debe na Hulanda

ORANJESTAD - Prome Minister Evelyn Wever - Croes a reuni cu Prome Minister di Hulanda Mark Rutte. Segun e informacion di premier Wever, durante di e reunion aki Premier Rutte lo a expresa palabranan di agradecimento pa e rol cu Aruba a hunga den e conferencia tocante awa cu a tuma luga recientemente na Nacionnan Uni. Ademas, a trata varios tema relaciona cu desaroyo di Pais Aruba. 

Durante e reunion cu Premier Rutte a trata varios tema di desaroyo di Aruba. A trata tambe e tema di situacion financiero di Aruba y cu ta riba rumbo di finanzas sostenibel y duradero, y aworaki ta papiando cu Hulanda riba pago di e debe cu tin cu Hulanda. Ademas a papia tocante e reformanan cu ta pensa di implementa pa haci Aruba un pais mas fuerte y resiliente. Pues tur esey a pone cu tabatin un reunion hopi interesante. Asina poco poco ta estrecha e lasonan mas, prome Minister Wever - Croes a splica.

Finalisando e reunion, ambos Prome Minister a desea otro palabranan di exito pa atende cu e retonan presente na cada Pais. Y Premier Rutte a indica cu e ta preparando pa realisa un  biahe pa Aruba pronto. E tabata un bon reunion, Prome Minister termina bisando.