Perret Gentil: Impacto di BBO na frontera pa construccion y prijs di cas na lo ta considerabel

ORANJESTAD – E impacto di BBO na frontera pa construccion y prijs di cas na lo ta considerabel. Asina e conocido desaroyado di proyecto Alberto Perret Gentil ta bisa diahuebs. Segun e desaroyador, e aumento di prijs di cas a bira un tema ultimamente hopi discuti na Aruba, particularmente entre stakeholders, como tambe entre personanan cu kier yega na nan propio cas. “Opinion popular ta culpa e industria di Vacation Rental como motibo principal di e aumento aki” Perret Gentil ta cuminsa na bisa. E ta referi na e hecho cu Gobierno di Aruba, recientemente a dicidi pa introduci un impuesto na frontera di 7% (BB0, BAZV, BAVP), riba producto importa, incluyendo materialnan di construccion, lo cual a lanta mas preocupacionnan tocante e impacto riba e industria di construccion y prijs di cas. 

“E intencion di sostene proveedornan local ta algo sumamente positivo. Pero, e efecto directo cu e impuesto na frontera aki ta trece cu n’e pa costonan di construccion y consecuentemente prijs di cas, no por wordo ignora” e desaroyador ta sigui bisa.  E incapacidad di companianan di construccion y desaroyadornan pa por compensa e BBO ora nan ta bende cas, ta loke cu a aumenta prijsnan di cas, Perret Gentil ta sigui splica. “E impacto di e ‘grens belasting’ riba e industria di construccion por wordo cuantifica si bay tuma den consideracion cu companianan di construccion ta importa 80% di nan materialnan directo, di cual 60% ta costo di construccion”. Esaki lo nifica, segun Perret Gentil, cu si gobierno impone un belasting di 7% riba materialnan importa, esaki lo causa un aumento directo di 5.6% den e costonan di e materialnan (cu ta 80% di 7%). “Cu esaki, e costonan di construccion lo aumenta cu 3.4%, cu ta 60% di 5.6%.

E impacto aki ta significante, specialmente na momento cu tuma na consideracion e stagnacion di salarionan na Aruba den e ultimo decada”. E impuesto halto di importacion segun e desaroyador ta bisa, oligopolio entre suministradornan y subcontractors, productividad abou y burocracia, ta e causa real cu costonan di construccion na Aruba ta mas cu 30% mas halto cu na Merca, por ehempel. “E impacto di e ‘grens belasting’ lo solamente empeora e problema aki y haci’e mas dificil pa un parti grandi di nos poblacion por traha of cumpra nan propio cas. 

Ademas, mester remarca cu e falta di casnan accesibel, den palabra popular ‘affordable’, durante e ultimo dos decada ta preocupante” e ta sigui bisa. Iniciativanan manera ‘Casbon’ of ‘Caribbean Town’ ta hopi positivo, pero no ta cualifica como casnan accesibel (affordable), como cu ya e prijsnan ta na un nivel poco mas halto di cual no ta tur hende tin a capacidad financiero, segun Perret Gentil. Introduccion di un maneho amplio pa casnan accesibel cu ta inclui subsidio pa e cumprado como tambe incentivanan fiscal, ta tardando tambe segun. desaroyador. “Gobierno di Aruba tin di tuma accion pa trata e problema aki y brinda un solucion cu realmente ta haci cas mas accesibel pa tur hende”. 

Perret Gentil ta bisa cu ta importante pa menciona cu na Merca estudionan conduci pa ‘National Bureau of Economic Research’, ‘UCLA’, y ‘University of Southern California’ ta indica cu cada aumento di 10% di ‘listings’ riba ‘Airbnb’, nifica cu prijs di cas ta aumenta cu 0.76%. Aunke esaki lo ta diferente cu mercado di Aruba, e por duna si indicacion di e potencial impacto cu e industria di Vacation Rental tin riba prijsnan di cas. “E problema di accesibilidad di casnan na Aruba pa un prijs pagabel, ta un problema pa varios aña caba”. Na 1995 a introduci un ‘Plan di Vivienda’ caba, pero a bira tempo pa Gobierno revisa e plan na e situacion actual, e ta sigui bisa. “ E solucion mas simpel lo ta pa desaroyadornan compensa e BBO cu impuesto di transferencia na momento di benta. Esaki no solamente ta beneficia y stimula e industria di construccion, pero tambe ta yuda controla e crecimento di prijs di cas cu ta causa pa alocacion di Vacation Rental. Ta tempo pa tuma accion y implementa e solucion aki pa asegura un futuro sostenibel pa nos mercado di cas” Perret Gentil ta finalisa bisando.