Operacion di e establecimento Bochincha, ta stop ‘per direct’

ORANJESTAD – E conocido centro Bochincha, a stop su operacion ‘per direct’ dialuna ultimo 3 di April. Loke cu esaki kier men, ta cu e parti central como entertainment y e bar anochi a cera su portanan. Motibo di e ciere, segun su creador, comerciante Otmar Oduber, ta retonan grandi cu e la sostene cada luna cu a sigui despues di su detencion aña pasa, y awor esaki a bira di tal forma cu mester a para e operacion. “E retonan a bira solamente mas grandi cada luna y awe no a keda nada otro cu tuma un decision bastante radical y doloroso, pero cu e meta di por re-structura, re-organisa y re-inventa Bochincha, pa por dune e oportunidad di por tin un continuacion” Oduber a bisa como un reaccion riba su pagina di Facebook. 

KICO SI TA KEDA HABRI?

Den un reaccion cortico na Noticiacla, Oduber a splica cu tin tiendanan (tenants) cu lo keda opera nan servicio di lunch merdia y/of delivery y pickup service anochi.