Mary Rose Andrews a celebra 25 aña cu MetaCorp

ORANJESTAD - MetaCorp a celebra aniversario di Mary Rose Andrews y durante e celebracion Eddie de Veer, C.E.O di MetaCorp, a sorprende tur hende cu un carta skirbi pa su ruman homber Richard de Veer kende tabata ex-hefe di Mary. Den su carta el a menciona cu el a cera conoci cu Mary tempo cu Mary a cuminsa traha na Sonesta Hotel. Richard de Veer a describi Mary como un persona cu semper a traha duro y tabata motiva tur cu tabata traha cu ne. 

A organisa un evento bon atendi na Balashi Beer Garden, unda a invita colega, gerencia pero specialmente famia di e hubilario. Tur hende a pasa un rato ameno, corda e bon temponan y come algo y bebe algo hunto. Mary Rose a logra conta cu presencia di ambos ruman Eduardo y Gerardo de Veer na su evento, como tambe di e gerencia actual di MetaCorp. 

MARY A CAUSA UN IMPACTO

Mary a causa un impacto den e team y esey ta locual a impresiona tur hende. Algun aña despues el a bay traha pa The Cinemas cu awo ta The Movies. El yega na momento cu e compania tabata cambia pa digital projection. Mary a yuda forma e team door di train nan y motiva nan cu e mesun entusiasmo cu e semper tin. E semper ta cla pa cualkier reto.

FO’I TEMPO DI SONESTA

Mary Rose Andrews ta supervisor na The Movies. El a cuminsa cu su trayectoria di trabou na Sonesta. Mientras cu Sonesta no a habri ainda, el a cuminsa traha den casino na aña 1989. Ora cu a keda cla cu e hotel el a bay traha den e cocktail lounge. El a traha den e lounge pa cinco aña largo y despues el a bay Hulanda.  Ora cu el a bin bek for di Hulanda el a sigui traha cu MetaCorp te cu e dia di awe. 

MARY ROSE TA GRADICI

Mary Rose tin masha hopi anecdota cu e compania claro momento agradabel combina cu poco stress. Pero un hende cu e ta sinti su falta ta Richard de Veer. E tabata un hefe cu a siñ’e hopi cos y por a yam’e ki ora cu ta. Mary Rose ta contento di traha pa e compania MetaCorp. Mary no a spera di tende tanto palabra bunita for di Richard de Veer. E ta conta cu semper e ta puntra su tata p’e y ta haya potret pa wak. “Nunca bo ta lubida e hendenan cu ta bo tras pa siña bo e bon y malo den e trabou”, Mary Rose a comenta. 

TRAHA CU UN META

Pa e hobennan di awendia Mary ta conseha nan pa siña y pone un meta nan dilanti. Alabes e ta conseha nan pa traha bon pasobra ta pa turista nan ta traha. Aunke ta un trabou paga, semper duna un servicio cu un smile na cara. “No bin traha cu bo problemanan na trabou”, Mary Rose a conseha. No hiba problema trabou semper keda cu un smile y positivo.

TOCANTE METACORP

MetaCorp ta existi desde aña 1920 caba y a start den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den APEX y Ecotech. Despues di dos guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi. E compania a sigui desaroya cu apertura di New York Laundry y EcoGas. 

MetaCorp ta e empresa comercial mas bieu na Aruba cu mas di 100 aña di existencia continuo. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 añanan di progreso, cu talento manera Eddie de Veer y Guus Slabbekoorn na cabes di e compania. Noticiacla ta uni su mes na palabranan di felicitacion na Mary, y cu e sigui hopi aña mas den bon compania.