- Kes the Band di Trinidad confirma pa Flip Flop Festival na juni!
- DVG: A cuminsa hospitalisa hende localmente infecta cu Dengue
- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
Corte a rechasa peticion di AHATA pa ahusta e declaracion di impuesto di turista
ORANJESTAD – Corte den un sentencia recien, a rechasa e peticion di Aruba Hotel & Tourism Association (AHATA) pa ahusta e declaracion di impuesto pa turista. Tabata na 2022 cu gobierno di Aruba a cambia e tarifa di impuesto pa turista di 9.5% pa 12.5% entrante 1 di januari 2023. AHATA a indica cu esaki no por pasobra turistanan ta paga nan vacacion delanta incluyendo e impuesto, y cu mester tin un chens pa esnan cu a paga delanta den 2022 aunke ta usa e vacacion den 2023, di por paga e tarifa bieu. Huez di Corte den prome instancia a dicidi cu ta un huez specialisa riba impuesto mester dicidi riba algo asina y mirando cu no ta sigur cu un huez specialisa riba impuesto lo bay di acuerdo den e caso aki, e no por duna AHATA razon y pa cual e ta rechasa e peticion di e gremio hotelero.
ARGUMENTO DI GOBIERNO
Parti di e argumento di gobierno (lesa:Departamento di Impuesto) (DIMP) ta cu mientras cu e reservacion ta haci delanta, e pago real pa esun cu ta entrega e placa, ta sosode den e aña cu e cambio a tuma lugar, esta 2023 y como tal, mester cobra e tarifa nobo. AHATA ta disputa esaki, basa riba un carta cu DIMP a manda pa AHATA den December 2022 cu ta bisa cu ta posibel pa vacacionan paga completo prome cu 2023, por usa e tarifa bieu di 9.5%. Y como tal, ta culpa DIMP di ta duna un interpretacion robez di e pago di impuesto y ta den violacion cu loke DIMP mes a bisa den nan carta di fin di December 2022 unda cu ta bisa cu e loke cu AHATA ta pidi, ta posibel. Ademas AHATA ta lamenta cu DIMP no kier adapta e formulario di deposito unda cu ta duna e posibilidad pa paga e tarifa di 9.5% envez di 12.5%. Den nan peticion na huez, a pidi pa honra esaki toch y si DIMP no haci esaki, pa impone un multa di 100 mil florin pa cada dia cu DIMP no cumpli cu e sentencia. E hecho cu corte a rechasa e ponencia di AHATA, ta nifica cu AHATA su miembronan tin busca un otro caminda pa cana, esta via un huez specialisa riba e tema di impuesto. Esaki no ta kita afo cu AHATA su miembronan no por paga e 12.5% di tarifa awor. E hecho ta, segun e veredicto, cu e miembronan cu tin cu paga 12.5%, por entrega un obhecion manera cu cualkier persona por haci si nan no ta di acuerdo cu e loke nan a wordo cobra na impuesto.
REACCION DI AHATA
Den un reaccion pa Noticiacla, e CEO di AHATA Tisa LaSorte ta mustra cu e loke cu Gobierno y DIMP ta alega, esta cu AHATA su miembronan tin cu paga 12.5% no ta corecto. “ “E conclusion di Minister no ta corecto. Ta corte di impuesto lo determina cual tarifa mester paga pa reservacion paga na 2022 cu ta pa estadia na 2023”, LaSorte a bisa noticiacla literalmente. Pa e sentencia mes, click AKI.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
