Accionan di bloke sindical contra Prestatie Management System ta ‘on hold’

ORANJESTAD – E bloke di 5 sindicato, FTA, SPA, SIMAR, SADA y SEPPA a opta pa pone cualkier accion pendiente ‘on hold’ te ora cu nan defini e siguiente paso den nan seno. Asina e vocero di e sindicatonan, Eduard Maduro cu tambe ta presidente di e sindicato di douaneronan a bisa noticiacla. “Despues di a ricibi contesta di minister presidente (Wever Croes:red),   sindicatonan lo bai bek na su miembronan pa defini e siguiente paso” Maduro a bisa. “Unabes cu ta asina lew lo (sigui) informa” Maduro a sigui bisa.

ACCION PA DIAMARS

Inicialmente e intencion tabata pa diamars, esta ayera tene un otro accion di protesta dilanti Bestuurskantoor manera cu a haci siman pasa unda cu a entrega un manifiesto. Esaki pasobra a sinti cu gobierno no a contesta nan manera cu nan a desea. Pero despues gobierno formalmente a contesta e sindicatonan dialuna, esaki a pone cu e sindicatonan a dicidi cu mester reuni interno aworaki prome. Unabez cu esaki keda dicidi, lo bin afo atrobe cu nan siguiente paso.