Oduber: SOGA y OHL a yega na acuerdo pa sigui construi na HOH

Oduber: SOGA y OHL a yega na acuerdo pa sigui construi na HOH

Posted on 03/13/2023 3:59 pm AST | Updated on 03/13/2023 4:01 pm AST

ORANJESTAD - Stichting Ontroerend Goed Aruba (SOGA)SOGA y OHL Arellano Construction Company di Miami  a yega na un settlement cu lo percura cu e interrupcion di e proyecto(di construccion y ampliacion di hospital di Aruba)  ta bai ta minimal. Asina minister di salud Dangui Oduber a confirma pa noticiacla dialuna mainta. Esaki mester kibra e impasse cu a surgi 3 siman pasa cu a conduci na paro di tur trabou manera cu SOGA mes a confirma recientemente 2 siman pasa. 

CONFIRMACION 

Despues di varios dias di speculacion fin di luna pasa, tabata diabierna atardi 3 di maart 2023 cu e fundacion encarga cu e proyecto di renobacion y expansion di hospital Horacio Oduber, esta Stichting Ontroerend Goed Aruba (SOGA), a confirma cu enberdad tabatin un desacuerdo entre SOGA y e General Contractor OHLA, di e proyecto di Expansion y Renobacion di Dr. Horacio Oduber Hospital. Segun SOGA, a base di e desacuerdo riba extension di e terminación di proyecto e contratista a tuma e decision pa no sigui cu e proyecto di construccion. SOGA a sigura cu ta tumando tur e pasonan necesario pa sigura cumplimento cu e condicionan di e contrato y su derechonan.

PASADO

SOGA a sigura tambe cu na tur previo ocasion, cu a surgi un diferencia di opinion, SOGA y OHLA semper a sa di yega na solucion, basa riba stipulacionnan den e contrato di construccion. Basa riba un interpretacion di e contrato, cu ta diferencia di e interpretacion di SOGA, OHLA a conclui cu e por bandona e trabou, mandando e subcontratistanan local cas. Esaki apesar di tur esfuerzo di banda di SOGA, Hospital y Gobierno di Aruba, pa evita esaki.

ACUERDO NECESARIO

Siguientemente, SOGA a bisa di lo trata pa yega na e acuerdonan necesario pa asina trabou por wordo reanuda lo mas pronto cu ta posibel pa termina e proyecto. Segun SOGA, den e cuadro aki tabata importante pa menciona cu gran mayoria di e trabou a wordo ehecuta door di contratistanan local como subcontratista di General Contractor, cu sigur lo kier keda contribui, pa duna nos comunidad e hospital cu e merece. “E contratistanan local aki ta completamente capacita pa termina e proyecto pa locual cu falta” e comunicado di SOGA ta sigui bisa.

LO TERMINA E TRABOU

SOGA a sigura cu ta consiente di e importancia pa e trabou di expansion y renobacion di hospital, pa cual falta awor menos cu 10%, wordo finalisa mas pronto cu ta posibel. “SOGA su meta y compromiso ta pa e proyecto wordo completa full y na un bon manera, pa asina nos unico hospital na Aruba por sigi duna e servicio mereci, na comunidad di Aruba y na e turistanan cu ta bishita nos isla” e comunicado a finalisa bisando.

TRAHADONAN DI HOSPITAL

Mientrastanto hospital internamente e mesun diabierna a manda un memo pa su trahadonan pa splica nan e situacion actual cu a surgi entre e contratista y SOGA, unda cu a informa nan tambe cu e hunta ta pendiente pa sinta cu ministernan y SOGA pa asina atende cu e atencion actual. A priminti e trahadonan di lo mantene nan tur informa di e loke ta y lo sigui pasa.

  • Varadero
  • Powered by SETAR