Na Corsou, Rignald Recordino di e banda Doble R a keda declara e compositor di siglo 20

WILLEMSTAD - Ayera nochi den un sala yen den oula di Universidat di Kòrsou, a deklará Rignald Recordino komo Kompositor di Siglo 20.

E rekonosementu na Rignald Recordino a tuma lugá ayera anochi den un aktividat solemne kaminda e konosido kulturista i antropólogo kultural mr. dr. René Rosalia a presentá un antologia di obranan di Recordino. Vários situashon di loke ta pasa den nos komunidat, Recordino a transformá esaki den komposishonnan masha bunita.

En konekshon ku Dia Internashonal di Idioma Materno UNESCO CURAÇAO, Fundashon STRIPAN i Ministerio di Enseñansa, Kultura, Siensia i Deporte a enfoká e ilustre outor i kompositor di Kòrsou Rignald Sylvestre Recordino, e dia aki. Señor R. Recordino ta outor di mas ku 500 komposishon dediká na Kòrsou i e siudadano di Kòrsou. Kansionnan kaminda e ta musikalisá kuenta kòrtiku, poema romántiko i profundisá tradishon oral di e kultura riku di Kòrsou.

Serka Rignald Recordino e mensahe ta sentral den su obranan. E lokual e ke bisa nos, siña nos, eduká nos semper tin un mensahe. E a i ta promové papiamentu i na hopi okashon durante mei siglo, laga nos saboriá e tesoro ku nos tin na dicho, proverbio, ekspreshon, kuenta, historia, fábula, charada, chiste, mito i leyenda. Tur esaki mesklá den un sous sabroso di nos ritmonan di kuna manera entre otro wals, dansa, dansa korí, mazurka, tumba, tambú, seú, salsa antiano, merengue, pambiche, bomba i montuno kurasoleño i vários ritmo kombiná.

Manera un ebanista e ta laga rima yanga den su obranan. Su spesialismo ta kuenta bibu, kaminda por mira e suseso ku e ta deskribí tuma lugá den bo imaginashon. El a usa su músika, bateria i ritmo kaprichoso pa sasoná i karga su obranan. Ta p’esei su mensahenan semper ta yega. Ku su obranan di kurason el a yuda bringa e krísis di identidat ku Kòrsou ta biba den. Alabes el a promové patriotismo i halsa interes di e siudadano di Kòrsou pa su idioma materno papiamentu.

Ta pa e motibunan akí UNESCO CURAÇAO, Fundashon STRIPAN i Ministerio di Enseñansa,, Kultura Siensia i Deporte ta dediká Dia Internashonal di Idioma Materno 2023 na e genio musikal Rignald Recordino. NOTA: E texto ta traha den Papiamento fonetico di Corsou.