Grupo Ansary a bai di acuerdo pa paga 1 biyon florin na Banco Central di Corsou

WILLEMSTAD - E grupo di kompanianan enkabesá pa e magnate Hushang Ansary pa medio di un di nan abogadonan, den e kaso aki e bufete di abogado mr. Mirto Murray, a bai di akuerdo ku pago dje suma ku a keda imponé dor di korte di promé instansia. Ta trata aki di un suma di mas ku 1 biyon di florin. Esei ta loke por komprondé for di un karta ku e abogado a dirigí na gerensia di Banko Sentral di Kòrsou i St. Maarten.

Den su karta abogado mr. Murray ta informá ku na nòmber un di su klientenan Parman International BV (PIBV) ku ta un dje akusadonan den e kaso di Ennia e tin di informá lo siguiente: Den su deseo pa trese un fin na tur e prosesonan legal i pa yega na un solushon akseptabel, PIBV a outorisá e bufete aki pa deklará su disponibilidat pa kumpli kompletamente ku e veredikto di dia 29 di novèmber 2021 den korte di promé instansia. I esaki e lo ke hasi pa tur su klientenan envolví.

Seguidamente e abogado ta duna di konosé ku e ta prepará pa partisipá den reunionnan ku Banko Sentral i otro partisipantenan di su eskoho pa asina formulá e término di tempu nesesario pa kumpli ku e demanda.

VEREDIKTO

Manera ta konosí riba e fecha menshoná korte a disidí ku e grupo aki ku un tempu tabatin Ennia Group bou di su kustodia lo tin di skupi alrededor di 1 biyon florin pa dañonan kousá na e kompania di seguro. E kaso aki ta unu ku a keda presentá den un proseso maratóniko.

Pa loke ta e alegashonnan i loke ta akusá esnan den e kaso aki aki dje, por bisa ku nan ta kulpabel pa e dañonan ku Ennia a sufri i ku nan ta responsabel tambe. Korte a laga pisa hopi i tene hopi bon kuenta ku Ennia ta un kompania di seguro ku tin di wak interes di su klientenan portador di pólisa (penshonadonan) i ku riba término largu e tin di kumpli ku su obligashonnan. Segun korte, e maneho a kambia di tal sistema ku ya e interes dje klientenan no tabata sentral mas. I tur esaki a sosodé no opstante atvertensianan interno i opservashonnan di parti di Banko Sentral.

Tabatin komo práktika ku ta saka plaka mas tantu posibel for di e kompania. Por ehèmpel, e invershonnan ku Ennia a hasi den S&S a resultá hopi desbentahoso ya ku e resultadonan den kual por a papia di un suma di mas ku 743 mion florin a ser transferí pa otro entidatnan. Tambe por papia di pagonan di dividendo i gastunan eksesivo manera e.o. donashon, kompensashon di komisarionan, avionnan privá i kompensashon na personanan ku no tabata traha pa Ennia.

Korte a kompilá e sumanan di plaka ku Ennia a ser perhudiká di dje i den e siguiente kategorianan:

Invershon den S&S: fl. 743.940.000.-;

Pago di dividendo: Fl. 188.975.969.- ;

Donashon: fl. 20.791.970.-;

Gastunan di konsehero: fl. 6.136.250.-;

Salario pa personanan no den servisio: fl. 5.634.184.-;

Hunta di komisario: fl. 14.234.309.-;

Avionnan privá: fl. 27.722.282.-.

Tur esaki a yega na un gran total di 1.007.434.964 florin, pues mas ku 1 biyon florin

NOTA: E texto ta scirbi den Papiamento fonetico di Corsou