Oduber: Segun investigacion di Universidad di Aruba, 76% di trahadonan den turismo ta satisfecho

ORANJESTAD – Un investigacion cu facultad di Universidad di Aruba a haci riba turismo, ta indica cu 76% di e trahadonan den e ramo ey, ta satisfecho. Por lo menos asina e minister di turismo Dangui Oduber a sigura diamars. E la indica cu e tabata presente na e presentacion di e resultado. Noticiacla.com (ainda) no por a verifica esaki independientemente. E estudio cu e facultad a haci ta riba locual ta e satisfaccion y perspeccion di tur esnan cu ta labora den e idustria hotelero.

ENCUESTA

Pa realisa e estudio aki segun Oduber, a haci un encuesta den e sector di cual un total di 569 trahador a participa. Awor cu e estudio a keda finalisa, esaki a wordo publica y presenta na entre otro Ministerio di Turismo y Salubridad, ATA, AHATA, ATSA y tambe na e otro partnernan cu ta importante den nos unico pilar economico.

RESULTADO INTERESANTE

Minister Oduber ta haya e resultadonan hopi interesante, caminda 76% di e participantenan a indica cu nan ta satisfecho laborando den e industria turistico. Otro punto importante cu a resalta di e estudio ta cu locual ta e salario y beneficionan ta keda importante pero e no ta locual ta mas importante den e parti desisivo di su trabou, e mandatario ta sigura.

Segun e mandatario e resultado di e investigacion ta duna un bon bista di e situacion actual di esnan cu ta labora den e industria. E ta duna un bista riba e grado di satisfaccion, un bista di e perspeccion cu tin riba e beneficio y salarionan. E ta duna un bista tambe di con esnan cu ta labora ta wordo trata y kiko nan ta pensa di nan orario di trabou. Pues e investigacion a duna un bista general di con e situacion di trabou ta den e industria di cual a resulta cu 76% tabata satisfecho di ta laborando den e industria. Minister Oduber ta haya esaki un resultado hopi positivo teniendo na cuenta cu Aruba ta depende completamente for di turismo.