Raiz no tabata kier pa gobierno bay casacion, pero ta den minoria

ORANJESTAD – Partido di coalicion RAIZ tabata contra pa gobierno bay den casacion pa e ley di matrimonio di mesun sexo. Asina e minister di e partido Ursell Arends a mustra dialuna merdia durante un conferencia di prensa riba e tema.”Idealmente nos lo a desea pa no bay den casacion” Arends a bisa specificamente. “Pero esaki ta democracia” e mandatario a sigui bisa. Mas aleu por a compronde di su contesta na un periodista di con esaki a bay den conseho di minister, por a compronde cu debi na e  ‘constelacion di gobierno’ (MEP 9-Raiz 2 asiento), nan (Raiz) tabata basicamente ‘outnumbered’, osea den minoria. Normalmente, un partido lo a baha e gobierno, pero den e caso aki RAIZ a opta (un biaha mas ) pa no haci esaki y laga e destino den man di nan representantenan den Parlamento, ora cu e ley keda trata proximamente. 

DAMAGE CONTROL

E conferencia, mescos cu nan relato di prensa anterior, tabata mira como un tipo di ‘damage control’, pa minimalisa e daño cu esaki por a causa entre nan siguidornan cu kier pa a vota pro pa e ley aki pasa. “Nos no a dobla” Arends a sigui bisa, refutando e grito aki di opositornan y cierto medionan cu a bisa esaki den fin di siman. Mes momento Arends a duna un indicacion pa ki tempo por spera cu e ley mes keda trata, cu ta fin di mei, y tambe cu nan lo sostene y vota pro e ley. 

E COMUNICADO

Ora cu gobierno diabierna a informa cu nan ta bay casacion pa parti di e sentencia di 6 di December contra e grupo Orguyo, y ta laga e parti intacto di e parti di discriminacion contra matrimonio di mesun sexo, mesora Raiz a saca un comunicado cu nan ta para tras di e ley, y ta respeta e hecho cu gobierno ta bay casacion. E critica cu a bin di varios experto legal, ta cu no por  a bay casacion cu parti di un veredicto y parti no.’Of bo ta na estado of bo no ta” tabata e comentario cu tabata zona. Den caso di Raiz, a mustra cu nan a sostene nan partner pa e casacion, y tambe cu nan ta sigui sostene e ley. Awor ta resulta cu nan no a sostene nan partner, sino cu simplemente nan minoria a hunga un rol cu nan no por a haci otro di acepta.