Fundador di Microsoft Bill Gates a bira di 4 accionista di Heineken Holding

MEDINA – E fundador di e compania di computer Microsoft Bill Gates a cumpra accion den e compania di cerbez Heineken recientemente. Esaki a bira conoci diaranson. Su participacion ta di 3.7%. Heineken Holding ta e compania madre di Heineken, cu algo mas di mitar di e balor di e accionan. E accionan ey ta 53% den man di e compania di inversion  L’Arche Green di famia Heineken. Ta parce cu Gates a cumpra e accionan di e compania Mexicano Femsa, cu a bende 1.3 biyon euro na accion. E interes di Gates ta 0.9 biyon euro, y ta algo chikito si tene na cuenta cu e balor di Gates ta bon pa 119 biyon euro. Den comparacion, e heredero di Heineken  Charlene de Carvalho su interes na accion ta bon pa $15,2 biyon euro. Cu e compra, Gates ta bira mesora e di cuater accionista den e compania Heineken Holding, despues di L’Arche Greene, Femsa – cu ta bende su accionan – y   Lindsell Train Ltd. Unabez cu Femsa ta afo completamente, Gates lo bira e di 3 accionista di e compania.