Corte lo dicta sentencia den caso Avestruz mitar di April e aña aki!

ORANJESTAD – Pa mitar di April di e aña aki, pa ta exacto, 14 di April di e aña aki Corte lo dicta sentencia den e caso penal porta mas grandi cu Aruba a conoce den caso di corupcion cu tereno di gobierno esta e caso cu a haya e nomber di Avestruz. Esaki a keda confirma na noticiacla pa entre otro abogado David Kock. Cu e sentencia aki, ta bira conoci si kico lo ta destino di entre otro e ex minister y actual parlamentario Benny Sevinger y un cantidad di persona rond di dje, for di ex coordinador, y ex directornan di varios departamento lo ta conoci. Ademas tambe varios comerciante lo tende kico ta bira nan destino tambe. Sea cu nan ta haya un castigo y cua esaki ta of ta keda exonera di e cargo cu tin contra nan. 

E CASO

Un aña y 4 luna despues cu e la keda deteni pa e caso penal Avestruz, ex minister y actual parlamentario Benny Sevinger mester  presenta den corte na comienso di luna di September di aña pasa. Tres luna despues, huez a trata e ultimo dia di e caso mitar di December 2022, y a informa na final cu den e prome cuartal di 2023 e lo a dicta sentencia. Tabata remarkable e tempo ey cu e la opta pa no cera e caso ainda, cu a dune mas tempo pa delibera riba dje, envez di e acostumbrado 3 siman cu e tin unabez cu e cera un caso. 

CASTIGONAN

Ministerio Publico a exigi un castigo di prizon di 5 aña contra e ex-minister   Sevinger.  Na opinion di Ministerio Publico, Sevinger a haci su mes culpable di soborno, estafa di pais Aruba, abuso di funcion, labamento di placa y malversacion. Ademas Ministerio Publico a exigi cu Sevinger wordo saca for di e passief kiesrecht y cu e ta perde e derecho pa cubri cualkier puesto, pa e periodo maximal. Si Corte sigui e exigencia aki di Ministerio Publico esaki lo ta pa un periodo di 10 aña. Tambe lo cuminza un procedura di expriopacion (ontneming) contra dje pa un total di 914.651,72 Florin. Cu Sevinger a laga su mes wordo cumpra, a shock comunidad di Aruba gravemente. El a haci Pais Aruba daño y esey Ministerio Publico ta tene hopi na malo.

OTRO SOSPECHOSONAN

Ministerio Publico a pidi castigo tambe contra e sospechoso P. Sussebeek., ex-ambtenaar di DOW, cu ta un castigo di prison di 4 aña pa soborno y labamento di placa. Banda di esey a pidi e verbeurdverklaring di un suma di placa di 1.3 miyon dollar cu a wordo tuma den beslag na un banco na Curaçao. Segun Ministerio Publico, P. Sussebeek. ta esun cu a saca e probecho ilegal mas grandi den e investigacion Avestruz. El a probecha di su relacion cu e minister y a enrikece su mes a costo di e comunidad di Aruba.

MAS SOSPECHOSO

Otro sospecho den caso penal Avestruz cu a scucha OM pidi castigo contra, tabata e.o. L. Arends contra ken Ministerio Publico a exigi un castigo di prison di 3 aña y e boet maximo di 25.000 Florin. Arends ta wordo acusa di a estafa pais Aruba via varios proyecto y di soborno di e minister Ministerio Publico a exigi castigonan di prison di 2 aña y e multa maximo di 25.000 Florin contra e sospechosonan C.R.Mansur., E.R.Werleman y N.D.Nuñez. Nan tambe ta wordo acusa di estafa y falsificacion. E sospechoso N. a wordo condena anteriormente den e caso Ibis. Ministerio Publico a pidi 6 luna di castigo di prizon pa ex director di DIP F. Abath. Contra e otro sospechosonan a exigi trabao pa comunidad y multanan. Ministerio Publico a pidi vrijspraak den e caso contra sospechoso E.Biemans.