Dos periodista a hera keda deteni durante bishita di Famia Real na Parke Arikok

ORANJESTAD – Diamars mainta durante e bishita di Famia Real na Arikok, por poco e servicio local di proteccion di e Famia Real, mester a actua pa detene dos periodista Hulandes cu no kier a tende cu nan mester a tene nan mes na regla. Durante e parti na Balashi Gold Mines e incidente aki a tuma lugar. E periodistanan  nan no a tuma ordo di polis na serio, te ora cu un di e miembronan special di seguridad a dal nan un grito y e ora e hefe di RVD a bisa nan cu e agente ey tabatin tur autoridad pa detene nan. E momento ey nan a para stret, pa evita un detencion. 

COMPORTACION

For di dialuna tabatin keho di parti di prensa local riba esnan Hulandes ya cu nan (cierto miembronan di prensa Hulandes) tabata haci y deshaci y no tabata tene nan mes na e reglanan stipula pa e bishita. Manera ta conoci, prensa local y internacional mester a acredita nan mes pa por tin aceso na e bishita di e Famia Real. Hunto cu esaki a bin un cantidad di regla incluyendo mapa detaya unda tur prensa por a para y unda por a bay y unda no. Asina mes, for di dialuna tabatin hopi iritacion di prensa local, cu si tabata comporta nan mes, mientras cu algun, no tur, prensa Hulandes no a tene nan mes na e regla ey y tabata haci manera nan tabata gusta. Awe mainta esey pues a sigui unda cu dos miembro di prensa Hulandes a reta autoridad, y casi a keda deteni na mal ordo.