Wever-Croes: Situacion di Covid19 na Aruba ta bou di control!

ORANJESTAD – E situacion di Covid19 na Aruba ta bou di control. Asina prome minister di Aruba Evelyn Wever Croes a informa riba su pagina di Facebook e siman aki. Ademas e la bisa cu si dado momento cos cambia, gobierno lo informa debidamente riba esaki. Cu esaki, e mandatario ta refuta cualkier noticia cu ta circulando cu cos lo ta ‘for di control’, relaciona cu noticianan internacional cu tin problema atrobe, cuminsando na China y expandiendo pa otro partinan na mundo. Mes momento minister di salud Dangui Oduber tambe dialuna a reacciona riba un noticia cu lo tin 1000 caso di Covid19 na Aruba. Sgun e mandatario, esaki no ta berdad y cu e la sigura cu siman pasa tabatin apenas 20 caso y cu e no ta kere cu lo bay bek na e pandemia manera cu nos a conoce. 

CHINA

Ta conoci cu China ta bringando e brote aki un biaha mas y cu varios pais a tuma medida di precaucion pa Chinesnan cu ta biahando pa exterior. Hulanda ainda no a tuma medida drastico, pero si a provee (manera cu Noticiacla a raporta anteriormente caba) su personal di cabina di KLM pa uso di tapaboca special y baño apart den e avion. 

PANDEMIA Y ARUBA

Tabata aña pasa cu Aruba a sali for di e pandemia dado momento y laga tur cos los, esta tur medida cu tabata na su lugar, pa asina habri nos isla pa tur hende atrobe. For di e momento ey, cos a keda bou control y no por a papia mas di un pandemia asotando Aruba. A stop di publica casonan  semanalmente di Covid19.