A detene 3 persona relaciona cu maltrato di turista Canades

ORANJESTAD – Polis a detene un total di 3 persona relaciona cu maltrato di un turista Canades. For di diabierna 30 di december 2022 e prome detencion a cay na un cas na Pos Chiquito caminda un dama a wordo deteni y un auto a wordo confisca enconexion cu un echo sumamente lamentabel y condenabel. Ta trata di e caso di e turista crucero cu a bira victima di un agrecion fisico pisa. E caso a sosode dia 26 december 2022 anochi na Oranjestad. Ta trata di un turista di nacionalidad Canades cu tabata abordo di e crucero Voyager of the Seas hunto cu su casa y su tres yiunan.

Dialuna 2 di Januari  na un cas na Jan Flemming departamento di Recherche Oranjestad a detene e di dos sospechoso cu ta e homber di incialnan T. E. A. B. naci na Aruba di 24 aña.

Un rato pasa recherche a detene e di tres sospechoso na mesun cas na Jan Flemming. Ta trata di e homber inicialnan C.M.E. B. naci na Aruba di 21 aña. 

Mesora e sospechoso a wordo hiba warda pendiente di mas investigacion. 

Coleganan di Cuerpo Policial a traha incansablemente pa resolve e caso aki. Nos no ta tolera cu nos unico pilar economico wordo perhudica pa un paar di persona cu ta comete fechorianan asina aki. E turista mester sintie sigur ora e bin pasa su vacacion na Aruba. NOTA: E potret ta uno generico di detencion y no necesariamente di e caso specifico aki.