Un anochi magico den un dushi ambiente

ORANJESTAD - Diabierna ultimo, 16 di december, a tuma luga e concierto 'Canto di Pasco' den Klooster Imeldahof na Noord. Un edificio bao  iluminacion di luz y adornonan di Pasco, unda por a admira diferente pesebre, tambe e pesebre bibo interpreta pa e grupo 'Angelnan di Rosario'. 

E diferente coronan a duna un tremendo presentacion cu nan canticanan di Pasco, cu a resona asina bunita den e edificio monumental. 

A reina un ambiente dushi y cu e bazar por a disfruta di pasaboca, cuminda y obranan di man di Pasco. 

Fundacion Kapel di Bethania ta gradici un y tur cu a bin celebra e temporada aki hunto cu nos, tambe tur e integrantenan di e coronan cu a haci nan esfuerso pa duna un bunita presentacion e anochi aki. Gradicimento ta bay na Tica Giel y Igmar Maduro cu a bini cu e iniciativa y coordina e concierto. 

Na cada un persona cu a yuda den e bazar, tambe na voluntario- y amigonan di Fundacion Kapel di Bethania cu a duna nan tempo liber pa asisti nos.