KPA ta presenta su tradicional mensahe di fin di aña: Hunto manera un pais

MACUARIMA -  Cuerpo Policial Aruba un biaha mas ta den pleno preparacion pa lansamento di un otro mensahe di fin di aña. E aña aki altocomisario di Polis Drs. Ramon Arnhem a duna e departamento di comunicacion di Polis e luz berde pa asina presenta un mensahe den forma di un video pa nos comunidad.

Cada aña ta diferente pero e meta en comun ta pa ilustra  y yama danki pa e aña cu a pasa den un forma di un jingle. Esaki ta un regalo netamente saca for di curason di e 600 homber y muhernan balente di nos Cuerpo Policial pa nos Pais Aruba.

Tabata den tapara cu e tema di e aña aki ta “Hunto manera un Pais.” Un idea cu a nace un biaha mas pa un Polis brigadier Roque Angela cu lo guia y produci e mensahe di fin di aña.  Un produccion traha dor di Polis y presenta pa Polis bou di e departamento di comunicacion, informacion y prevencion di Cuerpo Policial cu ta Sr. Lito Lacle y Sra. Liliana Rasmijn. 

“Hunto manera un Pais” ta ilustra cu ariba nos Pais tin diferente nacionalidad ta biba manera: Mericano, Curasoleño, Dominicano, Chines, Colombiano, Filipino etc. Tambe tin diferente nacionalidad den nos oraganisacion Policial. Pero locual ta keda mesun cos ta cu nos tur tin un meta en comun pa hiba nos Pais padilanti y carga un solo bandera cu ta di Aruba. Esaki tambe locual lo refleha den nos mensahe pa motibo cu e meta principal di e altocomisario ta pa Hunto nos progresa, Hunto nos bai dilanti, Hunto nos ta pasa dor di reto pero Hunto nos ta celebra mayan.

Hunto cu Departamento di Cultura bou guia di Sr. John Freddy Montoya y Robert Maduro kende a bisa si y no a pensa dos bez pa yuda cu e produccion e aña aki.  

Nos comunidad, nos islanan rumannan y tambe for di Hulanda tabata puntra ki dia nos ta saca nos mensahe. Dia 22 december 2022 exactamente pa 11:00 mainta, BIBO ariba nan facebook page di Korps Politie Aruba nan lo lansa nan mensahe.