Premier Rutte riba tema di pasado di sclavitud: “Awe mi ta pidi disculpa’”

DEN HAAG – ‘Awe mi ta pidi di disculpa’, prome minister di Hulanda Mark Rutte a bisa na Papiamento, dirigi primordialmente pa Corsou (y Aruba) pa cu e tempo di sclavitud, cu Hulanda a yuda mantene, crea y sostene, creando un situacion inhumano pa personanan cu tabata afecta pa sclavitud. E mandatario a haci esaki den e respectivo idiomanan di e paisnan afecta. Y den cuadro di esaki, e la haci esaki tambe na Papiamento, pa Corsou. Esaki ta e resultado di un rapport grandi emiti aña pasa pa gobierno Hulandes pa con atende e situacion aki. No tabata sigur cu e mandatario lo a pidi disculpa directo y con e lo a atende e asunto aki. “Nos no ta pone un punto su tras, sino un comma” e mandatario a bisa, pa indica cu esaki no ta e fin cu e disculpa, pero un momento pa sigui drecha loke a bay robez. “Sclavitud mester wordo reconoci den e termino mas claro como un crimen contra humanidad” e la sigui bisa. “E tabata un sistema criminal cu a trece hopi tristeza”. 

ROBEZ

E mandatario a admiti tambe cu hopi tempo e no a sinti pa pidi despensa, debi cu e tabatin un bista diferente. “Mi a pensa hopi tempo cu sclavitud ta parti di historia, cu a keda den nos pasado. Pero mi tabata robez. Siglonan di oppression y exploitacion ta wordo sinti te cu awe ainda. “Nos mester wak e pasado di un forma habri y honestamente”

E RAPPORT

Den un rapport emiti na 2021 riba orden di ministerio di asuntonan interno, tabata poni cu Hulanda mester reconoce cu sclavitud tabata crimen contra humanidad y pidi despensa y cu e consecuencianan ta wordo sinti ainda. Riba 1 d juli 2023 ta 150 aña cu a bin un fin na sclavitud den e colonia hulandes di e tempo ey, e awe independiente Surnam. 

OTRO PAISNAN

Hunto cu Rutte, 7 otro mandatario hulandes, incluyendo secretario di estado Eric van der Burg cu ta na Aruba pa na nomber di Hulanda-, a biaha pa otro partinan di Reino pa pidi disculpa na nomber di gobierno Hulandes. Minister Karien van Gennip a bay  Bonaire, secretario di estado Alexandra van Huffelen a bay Corsou, secretario di estado Marnix van Rij   pa Sint-Eustatius, secretario di estado  Maarten van Ooijen paSaba, minister Ernst Kuipers pa Sint-Maarten y minister Franc Weerwind pa Surnam. Hulanda pa medio di e despensa, ta sigui entre otro paisnan manera Merca, Inglatera, Alemania, Vaticano, y Sur Africa.