Hues lo dicta sentencia den caso Avestruz den prome cuartal di 2023

ORANJESTAD – Envez di pone un fecha fiho pa dicta sentencia den e caso penal grandi Avestruz cu ta trata iregularidadnan den otorgamento di tereno erfpacht di gobierno, hues diabierna mainta a informa partidonan presente cu e ta tene e caso ‘habri’ y ta dicta sentencia ‘den prome cuartal di 2023’. Noticiacla a compronde cu legalmente esaki ta un ‘tactica’ cu huesnan ta usa pa duna nan mes mas tempo pa trata e caso y despues yega na un veredicto, enbez di ta mara na p.e. 3 siman di delibera unabez cu e cera e caso. Pa loke ta e caso mes, diabierna tabata e ultimo dia cu den practica, mester a trata e esaki cu Ministerio Publico y e sospechosnan. Despues di 3 luna di tratamento, esaki si a yega na su final, aunke cu oficialmente hues no a cera e caso.

DUPLIEK Y ULTIMO PALABRA

Loke a resta diabierna (awe) tabata pa abogado di e sospechosonan principal Sevinger y Sussebeek tene nan ultimo defensa (conoci como dupliek), mas bien reaccion riba loke fiscal a trece dilanti diaranson ultimo (conoci como repliek). Riba esey lo tin un raportahe separa riba noticiacla.com. Tambe a sigui e ultimo palabra di e dos sospechosonan cu ta normal despues di cada caso. Contrario na e sospechoso Sussebeek cu a djis desea hues hopi sabiduria cu e caso, Sevinger a bin prepara cu algun pagina. Hues, conociendo e situacion, a alerta Sevinger pa no haci politica cu e declaracion pasobra cu esey no ta e meta di su ultimo palabra. Na un of dos occasion, hues mester a alerta Sevinger, pero na tur, a dune e espacio pa papia. 

SENTENCIA

Bek pa loke ta e decision pa no pone un fecha specifico,  Noticiacla a compronde cu esaki ta pues un tactica cu huesnan sa usa pa duna nan mes mas espacio pa delibera riba dje, cu ta traha na su fabor, special den dianan di fiesta nos dilanti. Esaki pasobra unabez cu e hues cera e caso, pa ley e mester dicta un sentencia den por lo menos 3 siman di tempo. Pues door di pone un fecha specifico, e lo a mara su mes na e tempo ey. Y mirando e embergadura di e caso, e cantidad di documento (20 mil pagina di investigacion) y pleidooinan etc, e la opta pa usa e tactica menciona. Cu dianan di fiesta nos dilanti, esey lo a forma parti di e 3 siman aparentemente pa cual e hues a opta pa tuma e caminda aki. Pues lo mester warda pa dentro di e proximo tres lunanan di aña 2023, haya un sentencia di e caso grandi aki.