Cantante Nando Chirino contento y agradecido pa un 2022 hopi exitoso

AMSTERDAM - Nando Chirino cu ta residencia na Hulanda desde 2002, unda ela continua cu su carrera artistico, ta sumamente contento y agradecido cu e aña aki e por a deleita su fansnan, su siquidornan na Aruba cu dos tema nobo, cancionan clasico (cover songs) Kompa Style. Dos tema cu sin duda algun a cai na agrado,ya cu nan ta hopi bon zona na radio emisoranan y den fiestanan publico. 

Su single “To Love Somebody” (original di The Beegees) a bira number uno na varios radio emisora y pa varios siman. Su single mas recien cu ta ‘Ain’t no Sunshine’ (original di Bill Whiters) tambe a logra number uno y ta subiendo den Top Charts na e radio emisoranan. Tur dos e cancionan aki lo ta riba su EP cu e ta lansa den 2023. Su EP lo hiba e titulo “Something to Remember & Something to Forget’’ y lo consisti di 5 cancion di cual un di nan lo ta na nos idioma Papiamento. 

2022 tabata un aña hopi exitoso pa Nando Chirino, cu presentacionan na Hulanda y otro paisnan Europeo. Nando ta gradici e pueblo di Aruba inmensamente pa e sosten duna na dje como un artista den exterior, y su deseo sigur ta pa jega Aruba pronto, pa duna presentacionan pa asina un y tur por baila y goza di su cancionan Kompa Style.