Proyecto Erasmus+ cu curso pa trahador di organisacionnan local y internacional cu ta traha cu hoben

ORANJESTAD - CEDE Aruba a organisa un curso funda door di Erasmus+ cu a tuma lugar na Aruba. E curso cu a haya e nomber “CRECE” (Creation, Reflection, and Education for Community Empowerment) a tuma lugar di 28 di november pa 7 di december. 40 participante na curso CRECE a bin di un total di 20 organisacion di Europa, di Caribe y di Aruba.

E curso su meta tabata pa yuda e representantenan di e organisacionnan mehora nan metodonan pa traha cu hoben y alaves pa informa mas tocante di loke ta e subsidio di Erasmus+. E tabata un oportunidad unico pa crea collaboracionnan nobo entre e organisacionnan local y Europeo y tambe pa mehora nan capacidad pa traha den un contexto internacional. Pa conclui e curso, e participantenan a scirbi di nan experencianan durante di e dianan di CRECE.